သတင်းလွတ်လပ်ခွင့်မဲ့၍ မျှတသည့်ရွေးကောက်ပွဲ မဖြစ်နိုင်

နအဖစစ်အစိုးရက ရွေးကောက်ပွဲဆိုင်ရာ ဥပဒေ (၅) ခု ထုတ်ပြန်ပြီးသော်လည်း သတင်းရေးသားခွင့်ကို ဆက်လက် ပိတ်ပင်တားမြစ်နေသဖြင့် လာမည့်ရွေးကောက်ပွဲသည် လွတ်လပ်ပြီး တရားမျှတသည့် ရွေးကောက်ပွဲ မည်သို့မျှ မဖြစ်နိုင်ကြောင်း ပြည်တွင်းသတင်းစာဆရာများက ပြောသည်။

အပတ်စဉ်ထုတ် ပုဂ္ဂလိကဂျာနယ် အယ်ဒီတာတဦးက “ရွေးကောက်ပွဲဆိုင်ရာ ဥပဒေတွေနဲ့ နိုင်ငံရေးပါတီ ဖွဲ့စည်းခွင့်ဆိုင်ရာ ဥပဒေတွေ ထုတ်ပြန်လိုက်ပြီဆိုတာနဲ့ ကျနော်တို့က နိုင်ငံရေးသမားတွေ၊ နိုင်ငံရေးပါတီ ထောင်မယ့်သူတွေ၊ ဝါရင့်သတင်းစာ ဆရာတွေ၊ အခြား ထင်ရှားသူတွေရဲ့ အမြင်တွေကို စုစည်းရေးသားပြီး စာပေစိစစ်ရေးကို တင်ပြလိုက်တယ်။ အားလုံးနီးပါးကို ပိတ်ပင်ပစ်တယ်။ ရွေးကောက်ပွဲဥပဒေ ထွက်လာတာ ကောင်းပါတယ်၊ ကြိုဆိုပါတယ် ဆိုတာမျိုး နည်းနည်းပါးပါးလောက်ပဲ ဖော်ပြခွင့်ရတယ်” ဟု ပြောသည်။

အခြားဂျာနယ်အယ်ဒီတာတဦးက အဆိုပါဥပဒေများနှင့် ပတ်သက်သည့် ဆောင်းပါးများနှင့် တွေ့ဆုံမေးမြန်းခန်းတို့ကို ဝေဝေဆာဆာ ရေးသားတင်ပြခဲ့သော်လည်း စိစစ်ရေးက ခွင့်မပြုကြောင်း၊ ယုတ်စွအဆုံး ဥပဒေတွင်ပါသည့် အချက်အချို့ ကောက်နုတ်ဖော်ပြခြင်းကိုပင် ပိတ်ပင်ခံရကြောင်း ပြောသည်။

ဝါရင့်သတင်းစာဆရာကြီးတဦးက “လွတ်လပ်ပြီး တရားမျှတတဲ့ ရွေးကောက်ပွဲ လုပ်မယ်ဆိုရင် လွတ်လပ်စွာ ထုတ်ဝေခွင့် ပေးရမယ်၊ လွတ်လပ်စွာ ရေးသားခွင့်ပေးရမယ်။ နိုင်ငံရေးပါတီတွေက လွတ်လပ်စွာ ရေးသားဖော်ပြပြီး ပြည်သူတွေကို စည်းရုံးမယ်၊ သတင်းစာဆရာတွေကလည်း ကော်မရှင်ကအစ၊ နိုင်ငံရေးပါတီတွေအဆုံး အားလုံးကို မှန်မှန်ကန်ကန် မျှမျှတတ ဝေဖန်သုံးသပ်နိုင်ရမယ်။ ဒီအခွင့်အရေးမရှိရင် နအဖစစ်အစိုးရက ကျင်းပမယ်ဆိုတဲ့ ရွေးကောက်ပွဲဟာ ဘယ်လိုနည်းနဲ့မှ တရားမျှတတဲ့ ရွေးကောက်ပွဲ မဖြစ်နိုင်ဘူး” ဟု ရှင်းပြသည်။

ယခု ရွေးကောက်ပွဲ ဥပဒေများ ထွက်လာပြီးချိန်အထိ စာပေစိစစ်ရေးဆိုင်ရာ မူဝါဒ လုပ်ထုံးလုပ်နည်းများ လုံးဝပြောင်းလဲခြင်း မရှိသည့်အပြင် ပိုမိုဆိုးရွားလာသည့်အတွက် စစ်အစိုးရက ကျင်းပမည့် ရွေးကောက်ပွဲသည် လွတ်လပ်ပြီး တရားမျှတသည့် ရွေးကောက်ပွဲ လုံးဝမဖြစ်နိုင်ကြောင်း ဝေဖန်သုံးသပ်နေကြခြင်းဖြစ်သည်။

မြန်မာနိုင်ငံတွင် အစိုးရထုတ် သတင်းစာ (၃) စောင်သာရှိပြီး ပုဂ္ဂလိကများကို နေ့စဉ်သတင်းစာ ထုတ်ဝေခွင့်မပေးဘဲ အပတ်စဉ်ထုတ် ဂျာနယ်များကိုလည်း အာဏာပိုင်တို့နှင့် နီးစပ်သူအချို့ကိုသာ ထုတ်ဝေခွင့်လိုင်စင် ပေးထားသည်။

လိုင်စင်ချထားပေးရာတွင် သတင်းစုံ၊ အနုပညာ၊ အားကစား၊ ကျန်းမာရေး၊ စသဖြင့် အမျိုးအစားခွဲခြားထားပြီး လိုင်စင်အမျိုးအစား ခေါင်းစဉ်အောက်၌ မပါသည့် သတင်း၊ သတင်းဆောင်းပါးများ ရေးသားဖော်ပြခွင့် မရှိပေ။

ဂျာနယ်ထုတ်ဝေမှုတွင်လည်း စာမူကို နှစ်ကြိမ်တင်ပြနိုင်ပြီး ဖြုတ်ပယ်ခိုင်းသမျှ ဖြုတ်ပယ်ရကာ ခွင့်ပြုချက် မပေးလိုသည်များကို သက်ဆိုင်ရာ ထောက်ခံချက် တောင်းဆိုသည့်အပြင် သတင်းအတော်များများကိုလည်း မျက်နှာဖုံးတွင် သုံးရန် ခွင့်မပြုဆိုသည့် မှတ်ချက်များ ပေးလေ့ရှိကြောင်း သိရသည်။

ဂျာနယ်တစောင်တွင် တပတ်လျှင် သတင်း၊ ဆောင်းပါးအပုဒ်ရေ (၁ဝ) မှ (၂ဝ) ကြား ပိတ်ပင်ခံရတတ်ပြီး ဂျာနယ်ပေါင်း ရာနှင့်ချီ ရှိသည့်အတွက် တပတ်ကို သတင်းအပုဒ်ပေါင်း ထောင်နှင့်ချီ ပိတ်ပင်ခံရကြောင်း၊ ဂျာနယ်မျက်နှာဖုံးကို သီးသန့် တင်ပြရပြီး စာပေစိစစ်ရေး အလိုကျ ဖြုတ်ပယ်၊ ပြင်ဆင် ပေးကြရကြောင်း သိရသည်။

ခွင့်ပြုချက်ရ၍ စက်တင်ပုံနှိပ်နေချိန်ကျမှ တခါတရံ အချို့သတင်းများကို ခွင့်မပြုနိုင်ကြောင်း တယ်လီဖုန်းဖြင့် အကြောင်းကြားခြင်းမျိုး ရှိသည့်အတွက် ဂျာနယ်ထုတ်ဝေသူများ သိန်းဆယ်နှင့်ချီ ငွေကြေး ဆုံးရှုံးရမှုများလည်း ရှိသည်။

မျိုးဝင်းဇော်/ ၁၆ မတ် ၂ဝ၁ဝ
ရင်းမြစ်။ ။ခေတ်ပြိုင်