Saturday, April 10, 2010

ပွင့်လင်းမြင်သာတဲ့ ရွေးကောက်ပွဲဖြစ်ဖို့ အာဆီယံတောင်းဆို

စစ်အစိုးရရဲ့ လာမယ့် ၂၀၁၀ ရွေးကောက်ပွဲကို မြန်မာနိုင်ငံ အမျိုးသားပြန်လည်သင့်မြတ်ရေးအတွက် ဦးတည်ဆောင်ရွက်ဖို့ အာဆီယံ ခေါင်းဆောင်တွေက မြန်မာစစ်အစိုးရကို တိုက်တွန်းလိုက်ပါတယ်။ ဒါပေမဲ့ အခု ပြီးခဲ့တဲ့ အာဆီယံ ထိပ်သီး ဆွေးနွေးပွဲကနေ မြန်မာနိုင်ငံအရေး ဘယ်လိုကိုင်တွယ်ကြမလဲဆိုတဲ့ တိကျတဲ့အဖြေကိုတော့ အာဆီယံခေါင်းဆောင်တွေ မဆွေးနွေးနိုင်ခဲ့ကြပါဘူး။ စုံစမ်းမေးမြန်းထားတဲ့ ကိုသားညွန့်ဦးက တင်ပြထားပါတယ်။                 

ပြီးခဲ့တဲ့ အာဆီယံ ထိပ်သီးဆွေးနွေးပွဲအတွင်းမှာ ဒေသတွင်း စီးပွားရေးနဲ့ ကုန်သွယ်ရေး ပူးပေါင်းဆောင်ရွက်မှုတွေကို အဓိက ဆွေးနွေးခဲ့ကြပါတယ်။ မြန်မာနိုင်ငံကိစ္စကိုတော့ အာဆီယံရဲ့ စိုးရိမ်ပူပင်မှုတခု အနေနဲ့သာ တို့ထိ ဆွေးနွေးခဲ့တယ်လို့ ပြောရမှာပါ။ အာဆီယံထိပ်သီးဆွေးနွေးပွဲအတွင်း ခေါင်းဆောင်တွေရဲ့  ဆွေးနွေးချက်ကို ထင်ဟပ်ပြီး အာဆီယံအလှည့်ကျ ဥက္ကဌ ဗီယက်နမ်နိုင်ငံကနေ မြန်မာနိုင်ငံအရေး ကြေညာချက်ထုတ်ခဲ့ပါတယ်။ အဲဒီမှာတော့ မြန်မာနိုင်ငံ အမျိုးသား ပြန်လည်သင့်မြတ်ရေးကို ရှေ့ရှုပြီး ၂၀၁၀ ရွေးကောက်ပွဲမှာ အားလုံးပါဝင်နိုင်အောင် လမ်းဖွင့်ပေးဖို့ တိုက်တွန်းခဲ့တယ်လို့ အာဆီယံ အတွင်းရေးမှူးချုပ် ဆူရင်းပစ်ဆူဝမ် က ရှင်းပြပါတယ်။
"မြန်မာအစိုးရ၀န်ကြီးချုပ်ကနေ အာဆီယံခေါင်းဆောင်တွေကို မြန်မာ့နိုင်ငံရေးအခြေအနေ ရှင်းပြသွားပါတယ်။ အဲဒီအပေါ်မှာ အခြား ခေါင်းဆောင်တွေ တုံ့ပြန်ဆွေးနွေးချက်အပေါ် တည်ပြီး အာဆီယံ အလှည့်ကျဥက္ကဌရဲ့ ကြေညာချက် ထုတ်ပြန်ပါတယ်။ မြန်မာအစိုးရအနေနဲ့ ဒီမိုကရေစီစနစ် ဖော်ဆောင်ရေး အစီအစဉ် ဆောင်ရွက်ချက်တွေကို ပြီးပြတ်တဲ့အထိ ဆောင်ရွက်ဖို့ ခေါင်းဆောင်တွေက အားပေးတိုက်တွန်းပါတယ်။ အခုလာမယ့် ရွေးကောက်ပွဲကနေ မြန်မာနိုင်ငံမှာ တကယ့်ကို စစ်မှန်တဲ့ အမျိုးသား ပြန်လည်သင့်မြတ်ရေး ဖြစ်လာစေမယ်လို့ မျှော်လင့်ထားပါတယ်။"

မြန်မာနိုင်ငံအနေနဲ့ အာဆီယံကို ပေးထားတဲ့ကတိက၀တ်အတိုင်း ဒီမိုကရေစီလမ်းပြမြေပုံကို အကောင်အထည်ဖော်ဖို့ လိုမယ်လို့ အာဆီယံခေါင်းဆောင်တွေက သတိပေးခဲ့ကြပေမဲ့ အသေးစိတ်ကိုတော့ ဆွေးနွေးခဲ့ခြင်း မရှိဘူးလို့ အတွင်းရေးမှူးချုပ် ဆူရင်းပစ်ဆူဝမ်က ပြောပါတယ်။

"ရွေးကောက်ပွဲနဲ့ပတ်သက်လို့ မြန်မာနိုင်ငံအနေနဲ့ အာဆီယံနဲ့ ကုလသမဂ္ဂကို ပူးပေါင်းဆောင်ရွက်သွားဖို့ တိုက်တွန်းပါတယ်။ အာဆီယံခေါင်းဆောင်တွေအနေနဲ့ မြန်မာနိုင်ငံ အခြေအနေအပေါ်မှာ စိုးရိမ်ပူပင်ကြောင်း ဖော်ပြခဲ့ကြပြီး၊ မြန်မာအစိုးရရဲ့ ကတိက၀တ်အတိုင်း ဒီမိုကရေစီလမ်းပြမြေပုံကို ရှေ့တိုးဆောင်ရွက်သွားဖို့ အားပေးခဲ့ကြပါတယ်။ ဒါပေမဲ့ အသေးစိတ်အခြေအနေကိုတော့ ဆွေးနွေးပြောဆိုတာမရှိခဲ့ပါဘူး။"

အာဆီယံ၊ ကုလသမဂ္ဂ အပါအ၀င် နိုင်ငံတကာအနေနဲ့ လာမယ့်ရွေးကောက်ပွဲမှာ နိုင်ငံရေးအင်အားစု အားလုံး ပါဝင်နိုင်အောင် ဒေါ်အောင်ဆန်းစုကြည်နဲ့ နိုင်ငံရေးအကျဉ်းသားအားလုံးလွတ်ပေးဖို့ အကြိမ်ကြိမ် တောင်းဆိုခဲ့ပါတယ်။ မြန်မာအစိုးရအနေနဲ့ကတော့ ယတိပြတ် အဖြေပေးတာတော့ မဟုတ်ပေမဲ့ လာမယ့်ရွေးကောက်ပွဲမှာ အားလုံး ပါဝင်နိုင်ရစေမယ်လို့ ပြီးခဲ့တဲ့ အာဆီယံအစည်းအဝေးမှာ မြန်မာနိုင်ငံခြားရေးဝန်ကြီးက အဖြေပေးခဲ့ဖူးပါတယ်။ ဒီအပေါ်ကို ထောက်ပြလိုတဲ့သဘောဖြစ်ပေမဲ့ နိုင်ငံရေးအကျဉ်းသားကိစ္စ၊ ဒေါ်အောင်ဆန်းစုကြည်ကိစ္စတွေကိုတော့ အာဆီယံ ခေါင်းဆောင်တွေ ပြောဆိုသွားခြင်းမရှိပါဘူး။ ဒါပေမဲ့လည်း မြန်မာနဲ့ နိုင်ငံတကာ ပြန်လည်ပြေလည်ဖို့ဆိုရင် အခု ၂၀၁၀ ဟာ အလှည့်အပြောင်းကာလပဲလို့ အာဆီယံခေါင်းဆောင်တွေ ယူဆတဲ့အကြောင်း အတွင်းရေးမှူးချုပ် ဆူရင်းပစ်ဆူဝမ်က ပြောပြပါတယ်။

"မြန်မာနိုင်ငံအနေနဲ့ နိုင်ငံတကာ အသိုင်းအ၀ိုင်းနဲ့ဆက်ဆံရေးမှာ ဘာပြဿနာမှ မကြုံရဘဲ မရှိရဘဲ နိုင်ငံတကာနဲ့ ထဲထဲဝင်ဝင် ချောချောမွေ့မွေ့ ဆက်ဆံနိုင်ဖို့ အခု ၂၀၁၀ ခုနှစ်ဟာ မြန်မာအတွက် အရေးအကြီးဆုံး အလှည့်အပြောင်း ဖြစ်တယ်လို့ အာဆီယံခေါင်းဆောင်တွေက ယူဆထားကြပါတယ်။"

အာဆီယံခေါင်းဆောင်တွေအနေနဲ့ မြန်မာအရေးစိုးရိမ်ကြောင်း ဖော်ပြပေမဲ့လို့၊ လူ့အခွင့်အရေး အဖွဲ့အစည်းတွေ ဒေသတွင်း လွှတ်တော်အမတ်တွေ တောင်းဆိုခဲ့ကြသလို မြန်မာနဲ့ပတ်သက်လို့ အာဆီယံရဲ့ ပြတ်ပြတ်သားသား ကိုင်တွယ်မှုမပြောနဲ့ ဝေဖန်တိုက်တွန်းပြောဆိုမှုတောင် မထွက်လာပါဘူး။ အခု လာမယ့်ရွေးကောက်ပွဲဟာ အမျိုးသား ပြန်လည်သင့်မြတ်ရေးကို ရှေ့ရှူပြီး အများအတွက် လမ်းဖွင့်ပေးပါလို့ဆိုပေမဲ့ လာမယ့် ရွေးကောက်ပွဲအတွက် လိုအပ်ချက်တွေကို မြန်မာဖက်က လက်ခံမယ်ဆိုရင် အကူအညီပေးသွားဖို့ အာဆီယံက ကမ်းလှမ်းခဲ့တယ်လို့လည်း သိရပါတယ်။

ရင်းမြစ်။ ။http://www.voanews.com/burmese/2010-04-09-voa6.cfm?rss=topstories

မြန်မာစစ်အစိုးရအပေါ် ခုံရုံးဖွဲ့စစ်ဆေးရန် ချက် ထောက်ခံ

နယူးဒေလီ (မဇ္ဈိမ) ။ ။ ဥရောပသမဂ္ဂ EU အဖွဲ့ဝင် ဗြိတိန်နှင့် ချက်နိုင်ငံက ဦးဆောင်တောင်းဆိုသည့် မြန်မာစစ်အစိုးရ ကျူးလွန်ခဲ့သည့် ဆိုးရွားသော ရာဇဝတ်မှုများအပေါ် ကုလသမဂ္ဂမှ ကော်မရှင်တရပ်ဖွဲ့ကာ စုံစမ်းစစ်ဆေးရန် တိုက်တွန်းချက်အား အခြားအဖွဲ့ဝင်နိုင်ငံများလည်း ထောက်ခံကြပါရန် ဘားမားကင်ပိန်း (ဗြိတိန်) က ပြောကြားလိုက်သည်။

စစ်အစိုးရ၏ လူသားချင်းစာနာမှု ကင်းမဲ့စွာ ကျူးလွန်ခဲ့သော ရာဇဝတ်မှုများကို ကုလ စုံစမ်းရေး ကော်မရှင်တရပ်က စုံစမ်းစစ်ဆေးရန် ထောက်ခံသည့် ချက်သမ္မတနိုင်ငံ၏ ရပ်တည်ချက်အား လန်ဒန်မြို့ အခြေစိုက် ဘားမားကင်ပိန်း (ဗြိတိန်) က ယနေ့ ချီးကျူးလိုက်ကာ အခြား EU အဖွဲ့ဝင်များပါ ထောက်ခံကြရန် ပြောဆိုခြင်း ဖြစ်သည်။

“ဒီလို နိုင်ငံတကာ ရာဇဝတ်မှုတွေကို စီရင်ဖို့ စုံစမ်းစစ်ဆေးရေး ကော်မရှင်ဖွဲ့ရေးကို အလေးအနက် စဉ်းစားသင့်တယ်လို့ ထင်ပါတယ်” ဟု ဘာမားကင်ပိန်း (ယူကေ) ၏ ဝက်ဘ်ဆိုဒ်တွင် ဖော်ပြထားသည်။

သတင်းထောက်၏ မေးခွန်းကို ဖြေကြားရာတွင် ချက်နိုင်ငံမြို့တော် Prague အစိုးရက “မြန်မာနိုင်ငံရဲ့ အဆက်မပြတ် လူ့အခွင့်အရေး ချိုးဖောက်မှုတွေကို ချက်အနေနဲ့ အထူးစိုးရိမ်မကင်း ဖြစ်မိပါတယ်။ စစ်အစိုးရက ဒီမိုကရေစီနိုင်ငံအဖြစ် လမ်းပြမြေပုံအတိုင်း သွားနေတယ်လို့ ဆိုနေပေမယ့် ကျင်းပမယ်လို့ ပြောတဲ့ ရွေးကောက်ပွဲရဲ့ မမျှတမှုတွေ၊ နိုင်ငံရေးဖိနှိပ်မှုတွေ၊ တိုင်းရင်းသား လူမျိုးစုတွေကို ရက်ရက်စက်စက် ဖိနှိပ်မှုတွေဟာ ရောမ သဘောတူညီချက် ဥပဒေစုထဲမှာ ဖော်ပြထားတဲ့ နိုင်ငံတကာ ရာဇဝတ်မှုတွေ ဖြစ်လို့ နိုင်ငံတကာ ရာဇဝတ်ခုံရုံးကို တင်နိုင်တဲ့ ကျူးလွန်မှုတွေပါပဲ” ဟု ဖြေကြားခဲ့သည်။

ချက်နိုင်ငံ၏ နိုင်ငံခြားရေးဝန်ကြီးဌာနမှ ပြောရေးဆိုခွင့်ရှိသူ ဖိလစ်ကန်ဒါအား မဇ္ဈိမက ဆက်သွယ် မေးမြန်းခဲ့ရာတွင်လည်း ချက်အစိုးရအဖွဲ့၏ ရပ်တည်ချက်ကို အတည်ပြုခဲ့သည်။

ရောမ ဥပဒေစုသည် ကမ္ဘာ့နိုင်ငံများမှ သဘောတူညီထားသော ဥပဒေစုတခုဖြစ်ပြီး ကုလ အထွေထွေညီလာခံ၏ ၁၉၉၈ ခုနှစ် ရောမမြို့တွင် အစည်းအဝေးအပြီး ၎င်းစာချုပ်အရ နိုင်ငံတကာ ရာဇဝတ်ခုံရုံး (ICC) ကို ဖွဲ့စည်းခဲ့သည်။ ၎င်းဥပဒေစုသည် ၂ဝဝ၂ ခုနှစ်တွင် စတင်သက်ဝင်ခဲ့သည်။

၂ဝဝ၉ ခု အောက်တိုဘာလအထိ နိုင်ငံပေါင်း ၁၁ဝ မှ ပါဝင်ကြပြီး ၃၈ နိုင်ငံသည် လက်မှတ် ရေးထိုးခဲ့သော်လည်း တကယ်တမ်း အတည်ပြုနိုင်ခြင်း မရှိခဲ့ပေ။ ၎င်းဥပဒေစုတွင် လူမျိုးတုံး သတ်ဖြတ်မှုများနှင့် အခြားပြင်းထန်သော နိုင်ငံတကာ ရာဇဝတ်မှု ကျူးလွန်သူများအား အရေးယူရန်အတွက် တာဝန်နှင့် ဥပဒေများ၊ တရားစီရင်ပုံစနစ်များ၊ ခုံရုံး၏ ဖွဲ့စည်းပုံများကို အဓိပ္ပာယ်ဖွင့်ဆို ဖော်ပြထားသည်။

ချက်နိုင်ငံသည် စစ်အစိုးရ ကျူးလွန်ခဲ့သည့် စစ်ရာဝတ်မှုများနှင့် လူသားချင်း စာနာမှုကင်းမဲ့စွာ ကျူးလွန်ခဲ့သည့် ရာဇဝတ်မှုများအပေါ် ကုလသမဂ္ဂမှ ကော်မရှင်ဖွဲ့ စစ်ဆေးရန် တတိယမြောက် တောင်းဆိုခဲ့သည် နိုင်ငံဖြစ်သည်။ ချက်၏ တောင်းဆိုမှု မတိုင်ခင် ထိုကဲ့သို့ တောင်းဆိုခဲ့သည့် နိုင်ငံများမှာ သြစတြေးလျနှင့် ဗြိတိန်တို့ ဖြစ်သည်။