Wednesday, April 14, 2010

၂၀၁၀ ဧပြီ မြန်မာနှစ်ကူး အတာသင်္ကြန်မြင်ကွင်း - ရိုးရာရေသဘင်

မိုးမခအထောက်တော် (သင်္ကြန်)

ရန်ကုန်မြို့ ကန်တော်ကြီးပန်းခြံနဲ့ ပတ်လမ်းများမှာ မြန်မာ့လူမှု့အသင်းအဖွဲ့များနဲ့ လုပ်ငန်းရှင်များရဲ့ ရိုးရာသင်္ကြန်မဏ္ဍပ်များနဲ့ ရိုးရာရေသဘင်ပွဲတော်နဲ့ အတာသင်္ကြန်ပွဲများကို ဖွင့်လှစ်လေ့ရှိပါတယ်။ ယမန်နေ့က မြင်ကွင်းအချို့ကို တင်ဆက်လိုက်ပါတယ်။


မြန်မာသင်္ကြန် မစည်ကားမှာကို အစိုးရ စိုးရိမ်




မြန်မာနိုင်ငံတွင်း ရန်ကုန်နဲ့ တခြားမြို့ကြီးတွေမှာ သင်္ကြန်ပွဲကို မစည်းကားဘူးဆိုတာ မဖြစ်ရအောင် အာဏာပိုင်တွေဘက်က သူတို့လိုချင်တဲ့ ပုံစံနဲ့ သင်္ကြန်ကို အတင်းအကျပ် ဖော်ဆောင်နေကြတယ်လို့ ဆိုပါတယ်။ ဒီနေ့ကျရောက်တဲ့ သင်္ကြန် အကြိုနေ့မှာ မြန်မာနိုင်ငံအတွင်း သင်္ကြန်ပွဲ ဆင်နွှဲမှု အသေးစိတ် အခြေအနေတွေကို ဆက်သွယ် စုံစမ်းထားတဲ့ ထိုင်းအခြေစိုက် သတင်းထောက် မအေးအေးမာက တင်ပြပေးထားပါတယ်။
Revelers hose water at people on a street during the New 
Year celebration in Yangon, Myanmar, Tuesday, April. 13, 2010-AP
ရန်ကုန်မြို့ရှိ ရေကစားမဏ္ဍပ်တခု။
ဧပြီ ၁၃၊ ၂၀၁၀။
ရန်ကုန်သင်္ကြန်ဟာ ဒီနှစ်မှာတော့ ရေကစား မဏ္ဍပ်တွေကို ကုမ္ပဏီတွေက မဖြစ်မနေ လုပ်နေရတယ်ဆိုပြီး ရန်ကုန်မြို့ခံတဦးက အခုလို ပြောပြပါတယ်။
“သင်္ကြန် ရန်ကုန်က အခြေအနေကတော့ အရမ်း အစည်ကြီးလည်း မဟုတ်ဘူး၊ မစည်ဘူးလည်း မဟုတ်ဘူး။ မဏ္ဍပ်တွေကလည်း ကုမ္ပဏီတွေ မလုပ်မနေရ ဟာတွေပေါ့၊ အဲဒီလိုမျိုးတွေတော့ ရှိပါတယ်။ ပိုက်ဆံရှိတဲ့ အသိုင်းအ၀ိုင်း၊ သူတို့သားသမီးတွေနဲ့ ကုမ္ပဏီ မဏ္ဍပ်တွေတော့ ရှိတယ်။ အရင်နှစ်တွေထက် စာရင်တော့ လုပ်တော့လုပ်တယ်၊ သူတို့ မစည်ဘူးလို့ ပြောမှာစိုးလို့လေ။ ရန်ကုန်သင်္ကြန် မစည်ဘူး၊ နေပြည်တော် မစည်ဘူး ဆိုပြီးတော့ ပြောမှာစိုးလို့ သူတို့နိုင်တဲ့ လူတွေကိုတော့ မဏ္ဍပ်ထိုးတာတွေ ဘာတွေ လုပ်ခိုင်းထားတယ်။”
ရေရှားပါးတဲ့ ရန်ကုန်မှာ မီးလာရင် မီးစက်မောင်းပြီး အ၀ီစိတွင်းက ရေကို ထုတ်ပြီး ရေကစားရသလို ခေတ်လူငယ်တွေကတော့ ကားတွေနဲ့ လည်ပတ်ပြီး ရေပတ်ခံ ထွက်တာမျိုးတွေကို ဒီနှစ်မှာ လုပ်နိုင်တာ သိပ်မတွေ့ရဘူးလို့ ဆိုပါတယ်။ ဒီနေ့ဟာ သင်္ကြန်အကြိုနေ့ ဖြစ်ပေမဲ့ စီးပွားရေး ကျပ်တည်းမှုတွေကြောင့် လူငယ်တွေ ရေပက်ခံ မထွက်နိုင်တာတွေကိုလည်း တွေ့ရကြောင်း ရန်ကုန်မြို့ခံက ဆက်ပြောသွားပါတယ်။
“ရပ်ကွက်ထဲမှာတော့ ဒီနေ့ အစပဲ ရှိသေးလို့လား မသိဘူး၊ ခါတိုင်းနှစ်ဆို ဒီအချိန်ဆို ရေပက်ခံကားတွေ ထွက်ကြတာ ဘာညာ ရှိကြတာပေါ့။ ဒီနှစ်တော့ ပထမရက်ပဲ ဖြစ်နေလို့လား မသိဘူး၊ အသံ သိပ်မကြားဘူး။ အခု ရေပက်ခံ ဂျစ်ကားတစီးကလည်း တနေ့ကို တသိန်းနဲ့ တသိန်းခွဲကြားမှာ ရှိတယ်။ အဲဒီကားကလည်း ၁၂ ယောက်လောက်ပဲ ဆန့်တယ်ဆိုတော့ ကလေးတယောက်က သင်္ကြန်လည်မယ်ဆိုရင် ကားခတင် ၁၀,၀၀၀ လောက်နဲ့ လမ်းမှာ စားမှာသောက်မှာနဲ့ဆိုရင် ၂၀,၀၀၀ လောက်ရှိမှ ဖြစ်မယ်ပေါ့။ အဲဒီလိုဆိုတော့ ကလေးတွေလည်း ဒီနှစ် သိပ်မထွက်နိုင်ဘူးနဲ့တူတယ်။
“ဒီနေ့ ရပ်ကွက်ထဲမှာ ကြည့်နေတာ သင်္ကြန်ကားတောင် မတွေ့ဘူး။ ခါတိုင်း ကိုယ့်ဘက်မှာ မဏ္ဍပ်မရှိတာတောင်မှ ရပ်ကွက်ထဲက ကလေးတွေက စုပြီး ကားငှားပြီး ရေပက်ခံ ထွက်ကြတယ်။ ပထမဆုံးနေ့ မို့လို့လားတော့ မသိဘူး၊ မနက်ဖြန်တရက် စောင့်ကြည့်ရဦးမယ်။”
ရခိုင်ပြည်နယ်ဘက်မှာတော့ သင်္ကြန်ကို လုပ်ရဖို့အတွက် ငွေကြေးကောက်ခံမှုတွေ ရှိနေတယ်လို့ ရခိုင်ပြည်သားတဦးက အခုလို ပြောပြပါတယ်။
“သင်္ကြန်ကတော့ ဌာနဆိုင်ရာပိုင်းကိုပဲ အဓိကထားတယ်။ ရပ်ကွက်တွေကိုလည်း ပိုက်ဆံကောက်တာတွေ ရှိတယ်။ သံတွဲမှာလည်း ရပ်ကွက်တခုကို ယိမ်းအသင်း ထွက်ရမယ်ဆိုပြီး တအိမ်ကို ၂,၀၀၀ ကောက်တယ်။ ကျပ်တည်းနေတဲ့ဟာကို အဲဒီလိုလုပ်တယ်။ သံတွဲကတော့ ခယက က ဦးစီးတယ်။ ကန်ပေါက်ကြတော့ တပ်က၊ စကခ ၅ က ရပ်ကွက်တိုင်း ထွက်ရမယ် ဆိုပြီးတော့ လုပ်တယ်။ အဲဒီမှာ တအိမ် ၅၀၀ စီကောက်တယ်။”
ရခိုင်သင်္ကြန်ကို လုပ်ခွင့်ပေးတာမျိုး မဟုတ်ဘဲ စည်ကားအောင်တော့ လုပ်ရမယ်၊ ရခိုင်လူမျိုးတွေ လုပ်နေကြ ရိုးရာယဉ်ကျေးမှုကို ပုံဖော်တဲ့ ပုံစံမျိုးနဲ့ မဟုတ်ဘဲ အာဏာပိုင်တွေ လုပ်ချင်တဲ့ ပုံစံနဲ့သာ လုပ်ခွင့်ရတယ်လို့လည်း ဆက်ပြောသွားပါတယ်။
“ရခိုင်သင်္ကြန် ပေးမလုပ်ဘူး ဆိုတာထက် သူတို့လိုချင်တဲ့ သင်္ကြန်မျိုးကို ဖန်တီးတာပေါ့။ ကျနော်တို့ဆီမှာ အရင်ကောင်စီခေတ်၊ မဆလခေတ်တုန်းက ကောင်စီဝင်တွေကအစ ဘာပဲပြောပြော ရခိုင်တွေဆိုတော့ ရခိုင်ယဉ်ကျေးမှုအရ မိန်းကလေးတွေက တဘက်၊ နောက် ယောက်ျားလေးတွေက လာလောင်း၊ အဲဒီလိုမျိုး ယဉ်ကျေးမှု သင်္ကြန်ပေါ့၊ သံချပ်တွေနဲ့ပေါ့။ အဲဒီလို လုပ်ခွင့်ရခဲ့တယ်။
“ဒါပေမဲ့ ဒီအစိုးရ တက်လာတဲ့ နောက်ပိုင်းမှာကျတော့ ရိုးရာယဉ်ကျေးမှု အစဉ်အလာတွေ ဖျောက်ပြီးတော့ သူတို့လိုချင်တဲ့ ပုံစံနဲ့ လုပ်နေတာပေါ့။ ကျန်တဲ့ဟာတော့ သူတို့ဦးစီးပြီး သူတို့ပဲ လုပ်သွားတာပေါ့ဗျာ။ အဲဒီသဘောမျိုးပေါ့။”
မြို့တော် နေပြည်တော်မှာတော့ ၀န်ထမ်းတွေက ရုံးပိတ်ရက် မိသားစုတွေဆီ ပြန်ခွင့်မရဘဲ အတင်းအကျပ် ကခိုင်းမှုတွေနဲ့ စည်ကားအောင် လုပ်နေကြောင်း ဆွေမျိုးသားချင်းထဲက ၀န်ထမ်းတွေ ရှိနေတဲ့ အမျိုးသမီးက ပြောပြပါတယ်။
“နေပြည်တော်ဘက်မှာ ကျတော့လည်း တချို့ဝန်ထမ်းတွေက ပြန်ချင်ကြတာပေ့ါ။ တချို့တွေက အကတိုက်ပြီး အတင်း ဇွတ်ပြန်လာတာတွေ ရှိတယ်။ တချုိ့ကျတော့လည်း မဖြစ်မနေ အကတိုက်တယ်၊ ဒါပေမဲ့ ပြန်ချင်ကြတာပေါ့၊ မိသားစုက ရန်ကုန်မှာ ရှိနေတဲ့အခါကြတော့။ နေပြည်တော်လည်း မစည်မှာ စိုးနေတယ်။ အခု သတင်းကြားနေတာ မစည်ဘူးလို့ မပြောရဘူးလို့တောင် ပြောနေတယ်တဲ့။ စည်တယ်ပေါ့၊ သူတို့ဝန်ထမ်းတွေ။”
မဟာသင်္ကြန်ဆိုရင် မန္တလေးမြို့ဟာ တကယ့်ကို စည်ကားတဲ့မြို့ ဖြစ်ပါတယ်။ တကယ့်ကို စည်ကားတဲ့မြို့တောင်မှ လူထုတွေ အနေနဲ့ မပျော်နိုင်ဘဲ မြို့သစ်တွေကို ရောက်သူရောက်နဲ့ စီးပွားရေးသမားတွေသာ လွှမ်းမိုးသွားတဲ့မြို့ ဖြစ်တာကြောင့် ရိုးရာယဉ်ကျေးမှုကို ဖော်ထုတ်ပြသမှုတွေ အားနည်းသွားပြီး မဟာသင်္ကြန်ဟာ ခြောက်ခြောက်သွေ့သွေ့နဲ့ ဖြတ်သန်းရတာ နှစ်ကာလတွေ ကြာခဲ့ပါပြီလို့လည်း မြို့ခံတွေက ပြောပါတယ်။

ရင်းမြစ်။ ။http://www.voanews.com/burmese/2010-04-13-voa6.cfm

တရုတ်ဝန်ကြီးချုပ် မြန်မာပြည် လာမည်

တရုတ်ဝန်ကြီးချုပ် ၀မ်ကြားပေါင် (Wen Jiabao) ဒီလနှောင်းပိုင်း မြန်မာနိုင်ငံကို သွားရောက်မယ်လို့ တရုတ်နိုင်ငံခြားရေး ၀န်ကြီးဌာန ပြောခွင့်ရသူ ကျန်းယူက ပြောကြားလိုက်ပါတယ်။ တချိန်တည်းမှာပဲ မစ်စ် ကျန်းယူက ဘက်ပေါင်းစုံ ပါဝင်ဆွေးနွေးမှုနဲ့ အမျိုးသား ပြန်လည်သင့်မြတ်ရေးကို ရရှိနိုင်ဖို့အတွက် မျှော်လင့်တယ်လို့ ပြောကြားသွားခဲ့ပါတယ်။ အပြည့်အစုံကို ဦးကျော်ဇံသာနဲ့ နော်ရှိုးတို့က တင်ပြပေးထားပါတယ်။

“မြန်မာနိုင်ငံမှာ အမျိုးသား ပြန်လည်သင့်မြတ်ရေးကို ဘက်ပေါင်းစုံ၊ ပါတီပေါင်းစုံက ညှိနှိုင်းဆွေးနွေး ရယူပြီး တည်ငြိမ်မှုနဲ့ ဖွံ့ဖြိုးတိုးတက်မှု ရယူနိုင်ဖို့ ရင်းနှီးတဲ့ အိမ်နီးချင်း မိတ်ဆွေနိုင်ငံတခု အနေနဲ့ တရုတ်နိုင်ငံက မျှော်လင့်ပါတယ်။”

တရုတ်နိုင်ငံခြားရေး ၀န်ကြီးဌာန ပြောခွင့်ရသူ မစ်စ် ကျန်းယူ ပြောသွားတာ ဖြစ်ပါတယ်။

တရုတ်ဝန်ကြီးချုပ် ၀မ်ကြားပေါင်ဟာ သူ့ရဲ့ခရီးစဉ် အတွင်းမှာ မြန်မာနိုင်ငံက အမျိုးသား ပြန်လည်သင့်မြတ်ရေးအတွက် တိုက်တွန်း ပြောကြားမယ်ဆိုတဲ့ သဘောမျိုးလား၊ မြန်မာနိုင်ငံမှာ စစ်မှန်တဲ့ အမျိုးသား ပြန်လည်သင့်မြတ်ရေး အတွက် တရုတ်အစိုးရက သေချာပေါက် နားလည်ရဲ့လား ဆိုတာနဲ့ ပတ်သက်ပြီး ဘယ်လိုထင်ပါလဲ၊ ဦးကျော်ဇံသာ ပြောပြပေးပါဦး။

“ဟုတ်ကဲ့၊ တိုက်တွန်းမှာပါ။ ဘာကြောင့်လဲဆိုတော့ တရုတ်နိုင်ငံသာ မက၊ နိုင်ငံတိုင်းလိုလို သူတို့ရဲ့ အိမ်နီးချင်း နိုင်ငံတွေမှာ တည်ငြိမ်မှုရှိတာ၊ ဖွံ့ဖြိုးတိုးတက်နေတာကို လိုလားကြမှာ ဖြစ်ပါတယ်။ မြန်မာနိုင်ငံမှာ နိုင်ငံရေး ပြေလည်မှုမရှိ ဖြစ်နေတယ် ဆိုတာကို တရုတ်က သိတယ်။ မြန်မာနိုင်ငံ တည်ငြိမ်ရင် သူတို့နိုင်ငံရဲ့ အနောက်မြောက်ဒေသ ပိုပြီးတော့ အကျိုးရှိမယ်၊ စီးပွားရေး ပိုပြီးလုပ်နိုင်မယ် ဆိုတဲ့သဘော ဖြစ်ပါတယ်။

“မြန်မာဘက်က သဘာဝဓာတ်ငွေ့တွေ၊ မြန်မာဆိပ်ကမ်းတွေကို အိန္ဒိယ သမုဒ္ဒရာဘက်ကို ထွက်ပေါက်အဖြစ် အသုံးပြုနိုင်မယ့် အလားအလာ၊ တခါ မြန်မာနိုင်ငံကိုဖြတ်ပြီး ဘင်္ဂလားဒေ့ရှ်၊ အိန္ဒိယဘက်ကို ပစ္စည်းတင်ပို့နိုင်မယ့် အခြေအနေတွေက တရုတ်အတွက် လက်တွေ့ အကျိုးရှိတဲ့ ကိစ္စတွေ ဖြစ်ပါတယ်။ ဒါ့အပြင် မြန်မာဘက်က မူးယစ်ဆေးဝါး တရုတ်ဘက်ကို လာရောက်နေတဲ့ ကိစ္စကိုလည်း မြန်မာနိုင်ငံမှာ တည်ငြိမ်မှု ရှိလာရင် ပိုပြီး ထိန်းသိမ်းနိုင်မှာ ဖြစ်ပါတယ်။

“မြန်မာနိုင်ငံ နိုင်ငံရေး ပြေလည်ဖို့အတွက် တရုတ်က ဘာတွေလိုအပ်တယ်ဆိုတာ သဘောပေါက်မှာပါ။ ဒါပေမဲ့ မြန်မာနိုင်ငံမှာ ရွေးကောက်ပွဲကို အတိုက်အခံတွေ ပါဝင်နိုင်အောင် ဆွေးနွေး၊ ဥပဒေကို ပြုပြင် ဆိုပြီးတော့ ပုံစံမျိုးနဲ့ အတိအကျ တိုက်တွန်း၊ လက်ထောက်ချပြီး ညွှန်ကြားမှာတော့ မဟုတ်ပါဘူး။ ဒါ တရုတ်ရဲ့ မူဝါဒနဲ့လည်း သိပ်မသက်ဆိုင်သလို တရုတ်က ဒါမျိုး လုပ်လေ့လုပ်ထ မရှိပါဘူး။ တရုတ်နိုင်ငံဟာ ပြေလည်ဖို့ လိုအပ်တယ်ဆိုပြီး ယေဘုယျ သဘောအားဖြင့်တော့ တိုက်တွန်းတတ်ပါတယ်။”

အမျိုးသား ပြန်လည်သင့်မြတ်ရေး ဆိုလို့ အနောက်အုပ်စု နိုင်ငံတွေနဲ့ ကုလသမဂ္ဂတို့ကတော့ မြန်မာနိုင်ငံမှာ နိုင်ငံရေး ပြဿနာတွေကို တွေ့ဆုံဆွေးနွေးပြီးတော့ အဖြေရှာဖို့ တိုက်တွန်းနေပါတယ်။ ဒါကို တရုတ်တို့ဘက်က ထည့်သွင်း စဉ်းစားနိုင်မယ်လို့ ထင်ပါသလား။ ရွေးကောက်ပွဲကို အားလုံး လက်ခံနိုင်တဲ့ကိစ္စ ဖြစ်အောင်ရော တရုတ်အစိုးရက တိုက်တွန်းမယ်လို့ ထင်ပါသလား။

“မှန်ပါတယ်။ နိုင်ငံတကာ အသိုင်းအ၀န်းက မြန်မာနိုင်ငံမှာ လူ့အခွင့်အရေး၊ ဒီမိုကရေစီ တိုးတက်အောင် လုပ်ဖို့ ဆိုတာတွေကို အတိအကျ ထောက်ပြီးတော့ ပြောဆိုနေပါတယ်။ တရုတ်နိုင်ငံ အနေနဲ့လည်း ပြောမှာပါပဲ။ သို့ပေမဲ့ ဒီလို အတိအကျတော့ သူတို့ ပြောမှာ မဟုတ်ပါဘူး။ တရုတ်ဟာ ကမ္ဘာပေါ်မှာ အခုအခါ စီးပွားရေး အင်အားကလည်း အဆမတန် ကြီးထွားလာနေတော့ လူရိုသေ၊ ရှင်ရိုသေ ခေါင်းဆောင်နိုင်ငံကြီးတခု ဖြစ်အောင်၊ ဓနအင်အားနဲ့ လိုက်လျောညီထွေ ဖြစ်အောင် ဒါတွေတော့ လုပ်ရမှာပါ။

“ဒီပြဿနာကို ဆွေးနွေး အဖြေရှာကြဖို့ အတွက်လည်း တိုက်တွန်းမှာပါပဲ။ သို့သော် အတိအကျ ဘယ်ကိစ္စကို ဘယ်လိုလုပ်ဆိုပြီး ပြောလိမ့်မယ်လို့ မထင်ပါဘူး။”

အခုလိုမျိုး ကမ္ဘာ့နိုင်ငံရေးနဲ့ စီးပွားရေး အခင်းအကျင်းမှာ တနေ့တခြား အရှိန်အဟုန် မြင့်မားလာတဲ့ သူ့ရဲ့ အဆင့်အတန်းနဲ့ညီအောင် တရုတ်က တိုက်တွန်းရမယ် ဆိုတော့ ဒါဟာ ၀တ်ကျေတမ်းကျေ လုပ်တယ်ဆိုတဲ့ သဘောလား၊ ဒါဆိုရင် မြန်မာအစိုးရကရော တကယ့်ကို လိုက်နာမယ်လို့ ထင်ပါသလား။

“၀တ်ကျေတမ်းကျေ ဆိုတာထက် မြန်မာနိုင်ငံ တည်ငြိမ် အေးချမ်းနေတာဟာ သူတို့နိုင်ငံအတွက် အကျိုးစီးပွားလည်း ရှိနေတယ်ဆိုတာ ပြောခဲ့ပြီး ဖြစ်ပါတယ်။ ဒါပေမဲ့ နိုင်ငံတကာ အသိုင်းအ၀န်းက မြန်မာနိုင်ငံက ရွေးကောက်ပွဲကို လူတိုင်းလက်ခံနိုင်တဲ့ ရွေးကောက်ပွဲဖြစ်အောင် ပြင်ဆင်သင့်တာကို ပြင်ပေးဖို့ တောင်းဆိုထားပေမဲ့ တရုတ်ကတော့ ဒီလိုတောင်းဆိုမှာ မဟုတ်ပါဘူး။

“ကုလသမဂ္ဂ လုံခြုံရေးကောင်စီ အစည်းအဝေးမှာလည်း ဒီကိစ္စ ဆွေးနွေးတော့ တရုတ်သံအမတ်က ရွေးကောက်ပွဲဆိုတာဟာ ပြည်တွင်းရေးသာ ဖြစ်တဲ့အတွက် သူတို့ ဒီကိစ္စကို ဘာမှ ၀င်မပြောလိုဘူးဆိုပြီး အတိအလင်း ပြောထားပြီး ဖြစ်ပါတယ်။ ဆိုတော့ မြန်မာအစိုးရအဖို့ အတော့်ကို နေရထိုင်ရ သက်သောင့်သက်သာရှိမယ့် တိုက်တွန်းမှုသာ ဖြစ်ပါတယ်။ တရုတ်ရဲ့ နိုင်ငံရေးပြုပြင်ဖို့ တိုက်တွန်းတယ် ဆိုတဲ့ကိစ္စဟာ။

“တရုတ်ဘက်က တိုက်တွန်းတဲ့အထဲမှာ ပိုပြီး အလေးအနက် ရှိမယ့်ကိစ္စ၊ စစ်အစိုးရဘက်ကလည်း ပိုပြီး သတိထား လိုက်နာနိုင်မယ့် ကိစ္စကတော့ နှစ်နိုင်ငံ နယ်စပ်ဒေသက တိုင်းရင်းသားတွေ ပြဿနာပဲ ဖြစ်မယ်ထင်ပါတယ်။ ဒီအရေးမှာတော့ တရုတ်အစိုးရရဲ့ ဆန္ဒကို ဖီဆန်ပြီးတော့ စစ်အစိုးရဘက်က ပြင်းပြင်းထန်ထန် လုပ်ဆောင်လိမ့်မယ်လို့ မထင်ပါဘူး။”

ဦးကျော်ဇံသာ ရှင်းပြသွားတာ ဖြစ်ပါတယ်။

ရင်းမြစ်။ ။http://www.voanews.com/burmese/2010-04-14-voa2.cfm?rss=topstories

နေပြည်တော်သင်္ကြန် စည်ကားဖွယ်ရှိ

ဒီနှစ် ရန်ကုန်၊ မန္တလေး၊ နေပြည်တော် မြို့ကြီးတွေမှာ သင်္ကြန်ပွဲအတွက် ထူးထူးခြားခြား ဘယ်လိုပြင်ဆင်မှုတွေ လုပ်နေကြသလဲ၊ ဘယ်နေရာတွေမှာ ဘယ်လို သင်္ကြန်မဏ္ဍပ်တွေ ရှိမလဲ ဆိုတာကို စုံစမ်းထားတဲ့ မစုမြတ်မွန်က တင်ပြပေးထားပါတယ်။

ဒီနှစ်သင်္ကြန်ကတော့ နေပြည်တော်မှာ စည်စည်ကားကား သင်္ကြန်ပွဲတွေ ကျင်းပဖို့ ပြင်ဆင်ထားတာက ထူးခြားတယ်လို့ ဒေသခံတွေက ပြောကြပါတယ်။ နေပြည်တော်မှာ ရှိသမျှ ဟိုတယ်ကြီးတွေတိုင်းမှာ သင်္ကြန်မဏ္ဍပ်ကြီးတွေ လုပ်ရမယ်လို့ သက်ဆိုင်ရာက ပြောထားတာမို့ ဟိုတယ်လုပ်ငန်းရှင်တွေကလည်း သူတို့မဏ္ဍပ်တွေ စည်ကားအောင် အဆိုတော်တွေ၊ သရုပ်ဆောင်တွေကို တန်ရာတန်ကြေးထက် ပိုပေးပြီး ငှားထားကြပါတယ်လို့ ပြောပါတယ်။

“မတ်လ အစပိုင်းကတည်းက ဟိုတယ်ဇုန်တွေကို ညွှန်ကြားချက် ပေးလိုက်တာပေါ့။ မဏ္ဍပ်လုပ်ရမယ်၊ ဟိုတယ်ဝန်ထမ်း တွေရဲ့ အကပြိုင်ပွဲတွေ လုပ်ရမယ်ဆိုတော့ အဲဒီလပိုင်းကတည်းက လုပ်ငန်းရှင်တွေ အကုန်လုံးက တီးဝိုင်းငှားတာ၊ အဆိုတော်ငှားတာ၊ ကိုယ့်ဝန်ထမ်းတွေကလည်း အကတွေ ကျင့်နဲ့ အဲဒီကတည်းက စီစဉ်နေရတာ၊ မဏ္ဍပ်ဆောက်တဲ့ လုပ်ငန်းတို့ ဘာတို့။ အဲတော့ ဈေးကြီးပေးပြီးတော့ အဆိုတော်တွေ ငှားရတယ်။ သူတို့ဝန်ထမ်းတွေက အကတွေကျင့်ပြီး ပြိုင်ပွဲတွေလည်း လုပ်ရဦးမှာ။”

ဟိုတယ်လုပ်ငန်းနဲ့ နီးစပ်သူက ပြောပြတာ ဖြစ်ပါတယ်။

ရုပ်ရှင်သရုပ်ဆောင်တွေ၊ အဆိုတော်တွေ တော်တော်တော်များများ နေပြည်တော် သင်္ကြန်ပွဲကို သွားပြီး ဆင်နွှဲကြပေမဲ့ တောင်ကြီး၊ မန္တလေးမြို့တွေက သင်္ကြန်ပွဲကို သွားပြီး ဖျော်ဖြေကြမယ့် အဆိုတော်တွေလည်း ရှိပါတယ်။ အဲဒီထဲမှာ သရုပ်ဆောင်၊ အဆိုတော် ဝိုင်းစုခိုင်သိန်းက မန္တလေး Alpine မဏ္ဍပ်မှာ သီချင်းသွားဆိုမယ်လို့ ပြောပါတယ်။

“သင်္ကြန်မှာ မန္တလေး Alpine မှာ သီချင်းသွားဆိုပါမယ်။”

မန္တလေးပဲ သွားမှာလား၊ နောက် တခြားရော ဘယ်မြို့တွေသွားဖို့ အစီအစဉ် ရှိပါလဲ။

“မသွားဘူးအမ၊ Alpine မှာပဲ။ မနှစ်ကတော့ ရန်ကုန်မှာနေတယ်။ အရင်နှစ်တွေက လားရှိုးတို့၊ တောင်ကြီးတို့၊ မန္တလေးတို့ မဏ္ဍပ်တွေ သွားတယ်။ ဒီနှစ်ကတော့ မန္တလေး Alpine မှာရှိမယ်။”

နေပြည်တော်မှာလည်း သင်္ကြန် အကြီးအကျယ် ကျမယ်လို့ ကြားတယ်။ အဲဒီဘက်ရော ရောက်ဖြစ်ဦးမလား။

“မရောက်ဖြစ်တော့ပါဘူး။ Alpine က လေးရက်စလုံး ငှားထားပါတယ်။”

အဆိုတော် လေးဖြူတို့ရဲ့ Iron Cross တီးဝိုင်းကတော့ တောင်ကြီးမှာ သွားရောက် သီဆို ဖျော်ဖြေကြမယ်လို့ သိရပါတယ်။ ရန်ကုန်မြို့မှာတော့ ခါတိုင်း သင်္ကြန်မဏ္ဍပ်တွေနဲ့ စည်ကားတဲ့ အင်းလျားလမ်းနဲ့ တက္ကသိုလ်ရိပ်သာလမ်းတို့မှာ ဒီနှစ် မဏ္ဍပ်ဆောက်ခွင့် မရတာက ထူးခြားပါတယ်။ ဘာကြောင့်လဲဆိုတာ ရေရေရာရာ မသိရပေမဲ့ အရင်နှစ် မဏ္ဍပ်တွေဟာ ရထားတဲ့ ပါမစ်ထက် ပိုပြီးလုပ်ကြတယ်၊ ရေကစားကြသူတွေဟာ မြန်မာ့ယဉ်ကျေးမှုနဲ့ မဆီလျော်တာတွေ လုပ်နေကြသလို မဏ္ဍပ်တွေ ပြွတ်သိပ်နေတဲ့အတွက် ယဉ်ကြောပိတ်ဆို့မှုတွေ ဖြစ်တဲ့အတွက်လို့ ဆိုကြပါတယ်။ ဒီတော့ ရန်ကုန်မြို့ရဲ့ တခြားနေရာတွေမှာရော သင်္ကြန်မဏ္ဍပ်တွေရဲ့ အခြေအနေက ဘယ်လိုရှိပါသလဲ။

“အင်းလျားလမ်း၊ တက္ကသိုလ်ရိပ်သာလမ်းမှာ မရှိဘူး။ ပြည်လမ်းပေါ်မှာတော့ Air Bagan ရှိတယ်။ Air Bagan ဘေးနားမှာ တခုရှိတယ်။ နောက် ILBC နားမှာ တခု။ ပြည်လမ်းပေါ်မှာ မြင်ရသလောက်ကတော့ လေးခုလောက် ရှိတယ်။”

ဆရာစံလမ်းမှာရော မဏ္ဍပ်တွေ အခြေအနေ ဘယ်လိုရှိလဲ။

“ဆရာစံလမ်းမှာ အကြီးအကျယ် ဆောက်တာဆိုလို့ ကိုကို ညီညီ ဆလွန်းထဲမှာ မဏ္ဍပ် အကြီးကြီးတခုရှိတယ်။ အဲဒါ DJ တွေဘာတွေ ငှားပြီး အကြီးကြီးပဲ လုပ်နေတယ်။ နောက် တခြား မဏ္ဍပ်လေး တခုနှစ်ခု အဲဒီလောက်ပဲတွေ့တယ်။ ကမ္ဘာအေး ဘုရားလမ်းမှာလည်း ဆီဒိုးနားမှာတခု၊ မျက်နှာချင်းဆိုင်မှာ တခု၊ အဲဒီနှစ်ခုရှိတယ်။ ကန်တော်ကြီး ပတ်လမ်းမှာတော့ မဏ္ဍပ် တော်တော်များများ ချပေးတယ်၊ ၁၆ ခုလောက် ရှိတယ်။”

အစိုးရမဏ္ဍပ်တွေကရော။

“လောလောဆယ် အစိုးရမဏ္ဍပ်ရယ်လို့ အကြီးအကျယ်ဆောက်တာ မရှိဘူး၊ မြို့တော်ခန်းမ တခုပဲ ဆောက်တာ။”

ရန်ကုန်မြို့က သင်္ကြန်ပွဲ ပြင်ဆင်မှု အခြေအနေကို ကိုယ်တိုင်သွားကြည့်ပြီး ပြောပြထားတာပါ။

ဒီနှစ် သင်္ကြန်ရေကစားသူတွေ အတွက် လိုက်နာရမယ့် အချက်ပေါင်း ၃၀ ကျော် ပါဝင်တဲ့ စည်းကမ်းချက်တွေကို စစ်အစိုးရက ထုတ်ပြန်ထားပြီး အဲဒီထဲမှာ သင်္ကြန်မဏ္ဍပ်တွေကို မြန်မာနာမည်တွေပဲ ပေးရမယ်၊ မလုံ့တလုံ ဝတ်စားဆင်ယင်မှုတွေကို မဝတ်ရဘူးဆိုတဲ့ စည်းကမ်းချက်တွေ ပါပါတယ်။

ရင်းမြစ်။ ။http://www.voanews.com/burmese/2010-04-13-voa2.cfm

၂၀၁၀…. ပိတောက်


နှစ်ရှည်လများ ဘယ်လိုအရပ်မျိုးမှာ

ခိုးခိုးပြီးပွင့်နေပါသလဲ အို…ပိတောက်

ငါ့ရဲ့ ရွှေအိုရောင် ပိတောက်တမ်းချင်းမှာ

အိပ်မက်တွေထဲ…

မင်းဟာ … အစိမ်းရောင်တွေနဲ့ပွင့်တယ်။


ငါဟာ….

စိတ်ကူးယဉ်တောလား ရေဖွဲ့ကျွမ်းသူ မဟုတ်ပါဘူုး

ခေတ်တခေတ်ကို စေ့ငုကြည့်တဲ့အခါ

ရိုးပြတ်နဲ့ စက်ရုံကျေးလက်တွေထဲ….

ငါ … မင်းကိုရှာခဲ့တယ်

ဧပြီလတိုင်းမှာပေါ့ …

စိတ်ကောက်ပြီး အရွဲ့တိုက်ပွင့်နေလည်း

စစ်မှန်တဲ့ မင်းရဲ့ ကိုယ်သင်းရနံ့က…

ငါ့ အပေါ် ထာဝရ မွေးမြနေဆဲမို့ပါ…။


ငါဟာ…

သူငယ်နှပ်စား တယောက်…

(ဖြစ်ကောင်း ဖြစ်နိုင်ပါတယ်)

ဒါပေမယ့်

မင်းကိုတော့ …

ငယ်ဘ၀ရဲ့ တပ်မက်မှုမျိုးနဲ့

ရိုးသားစွာ … ချစ်ခဲ့တယ်။


မရယ်နဲ့ … မာရီယာ

မင်း မရယ်ပါနဲ့ …

နှင်းတွေရဲ့ အနက်ရှိုင်းဆုံး အောက်ခြေထုမှာ

ဇာဘုရင်စနစ်ဆိုးကို သင်္ချိုင်းပို့ပစ်ခဲ့တဲ့

အောက်တိုဘာပန်းပွင့်တွေ…ပွင့်ခဲ့တယ်။


အေး … ဒီလိုပဲ

ငါတို့အရပ်ရဲ့ နွေဦးမတ်လတွေမှာလည်း

ဖက်ဆစ်ကို ….

အမြစ်လှန်ပစ်လိုက်တဲ့ နှင်းဆီနီတွေ ပွင့်တယ်၊

များမကြာမီမှာ…

ပိတောက်တွေက ဂုဏ်ပြုအမှတ်တရ ပွင့်တယ် …

ဒါဟာ …

ဖျောက်ပစ်လို့ မရတဲ့ အစစ်အမှန် သမိုင်းပဲ …။


ငါ … ယုံကြည်တယ်

၂၀၁၀ မှာ …မင်းဘာသာ ဘယ်နေရာမှာပဲပွင့်ပွင့်

အဲဒီပိတောက်တွေဟာ …

အေကေသေနတ်တလက်ရဲ့

တရားမျှတတဲ့ ဆာလောင်မွတ်သိပ်မှု သေနတ်ပြောင်းဝမှာ

သူ့ချစ်သူ ကျည်ရိုက်တံ မောင်းတုံးနဲ့

လှလှပပ ပွင့်လိမ့်မယ် ….။ ။




ကမာပုလဲ
ဧပြီ၊ ၂၀၁၀။

အတိုက်အခံခေါင်းဆောင်ဦးဝင်းတင်နဲ့ မေးခွန်းများ

လူမှုရေးနဲ့ နိုင်ငံရေးလှုပ်ရှားမှု အတိုင်းအတာ

အင်န်အယ်ဒီရဲ့ ဗဟိုပါတီကော်မီတီဝင်၊ အတိုက်အခံခေါင်းဆောင်၊ အနှစ် ၂၀ နိုင်ငံရေးအကျဉ်းသား၊ (ခုချိန်ထိ နိုင်ငံရေးအကျဉ်းသားတဦးလို နေထိုင်နေဆဲမို့ - အကျဉ်းသားဟောင်းလို့ မဆိုချင်)၊ သက်ကြီးဝါရင့် စာနယ်ဇင်းသမား ဦးဝင်းတင်နဲ့ မေးခွန်းတွေ ဆက်မေးဖြစ်တဲ့အထဲက ခုချိန်မှာ ရေပန်းစားတဲ့ မေးခွန်းတခုကို မေးဖြစ်ခဲ့ပါသေးတယ်။ အင်န်အယ်ဒီက နိုင်ငံရေးဆက်လုပ်မှာလား။ ဒါမှမဟုတ် လူမှုရေးလုပ်တဲ့ အဖွဲအစည်းအဖြစ်ကို “ဦးလှည့်” သွားတော့မှာလား ဆိုတဲ့ မေးခွန်းပါ။ ဆရာဦးဝင်းတင်က အခုလို ပြန်ပြောပြပါတယ်။
“ဒီနေရာမှာ ပြန်ပြီး ရှင်းပြချင်တဲ့အချက်က၊ မီဒီယာတွေမှာလည်း ပြောပြီးပါပြီ။ မတ်လ ၂၉ အင်န်အယ်ဒီပါတီရဲ့ ဆုံးဖြတ်ချက်က ဘာအဓိပ္ပါယ်လဲ ဆိုတဲ့အချက်။ ကျနော်က ဘာပြောခဲ့သလဲဆိုတော့ - ကျနော်တို့က အခုဒီလိုဆုံးဖြတ်လိုက်ကြတာလဲဆိုတော့ နိုင်ငံရေးမှာ ခေါင်းပြတ်မခံနိုင်လို့ ဆိုတာ ဖြစ်တယ်။ ခြေပြတ်၊ လက်ပြတ်တာကို ခံနိုင်မယ်။ ခေါင်းပြတ်သွားတာကို မခံနိုင်ဘူး။ ခြေပြတ် လက်ပြတ်ရင်တောင်မှ အစားထိုးပြီး ရှင်သန်လို့ရတယ်။ ခေါင်းပြတ်သွားရင် ခြေလက်တွေ ကောင်းနေသည့်တိုင် ဘာမှ အသုံးမ၀င်တော့ဘူး။ ဒါကြောင့် မတ် ၂၉ ဆုံးဖြတ်ချက်ဆိုတာ အင်န်အယ်ဒီသည် နိုင်ငံရေးဆက်လုပ်မယ့် ဆုံးဖြတ်ချက်၊ ခေါင်း အပြတ်မခံနိုင်ဘူးဆိုတဲ့ အဓိပ္ပါယ်ဖြစ်တယ် ဆိုတာကို ထင်ရှားစေချင်တယ်။ နားလည်ကြစေချင်ပါတယ်။”

အဲသည်မှာ ဆရာ့ကို ထပ်ပြီး မေးခွန်းထပ်ထုတ်တာက - ပါတီတွင်းမှာ အချို့က ပါတီ မရှိတော့ရင်၊ ပါတီအဖြစ် ဆက်လက် မရပ်တည်နိုင်တော့ရင် ဆိုတဲ့ အချက်တွေပေါ်မှာ အခြေခံပြီးတော့ အင်န်အယ်ဒီပါတီက အစိုးရမဟုတ်တဲ့အဖွဲ့အစည်းတခုလို၊ အင်န်ဂျီအိုတွေလိုမျိုး ရပ်တည်လာမယ် အစရှိသဖြင့် ထင်မြင် ယူဆ မှန်းချက်ထုတ် ပြောဆိုကြတဲ့ အချက်ကို ရှင်းလင်းပေးနိုင်ရန် မေးခွန်းမေးတာ ဖြစ်ပါတယ်။

“ဒီနေရာမှာ ပြောချင်တာက ကျနော်တို့တတွေဟာ နိုင်ငံရေးမပါဘဲနဲ့ လူမှုရေးတွေချည်းပဲ လုပ်နေလို့ မရဘူး ဆိုတာ ဖြစ်ပါတယ်။ လူမှုရေးဆိုတာကလည်း လူထုနှင့် တသားတည်း ရင်းနှီး ထဲဝင်ဖို့ အလွှာတခုအနေနဲ့ ရှိနေရမယ်။ ရှိနေတယ်။ ဒါ့ထက်မကတဲ့ နိုင်ငံရေးလုပ်ငန်းဆောင်တာတွေကို ဆက်လုပ်ဆောင်သွားရမှာ ဖြစ်တယ်လို့ ပြောချင်ပါတယ်။ ခုနင်က ပြောခဲ့သလို (ယခင်အင်တာဗျူးဆောင်းပါး - ဒီ/ချုပ်၊ ဒီ/လှုပ် ဆောင်းပါး) အင်န်အယ်ဒီရဲ့ ဂွင် လေး ဂွင်၊ ဒေါက်လေးဒေါက်မှာ ပြည်သူလူထု ဆိုတာက တခု ပါပြီး ဖြစ်နေတယ်။
ပါတီတွင်း တည်ဆောက်ရန်၊ မဟာမိတ်များနှင့် လက်တွဲရန်၊ နိုင်ငံတကာမှာ အားလုံးနှင့် ဆက်သွယ်ရန်၊ ပြည်သူလူထုနှင့် အတူတကွ ရှိရန် ဆိုတဲ့ အတွက် လူထုကို မျက်နှာမူတဲ့ နိုင်ငံရေးလုပ်ကြမယ်။ အဲသည်မှာ အလုပ်သမားအရေး၊ လယ်သမားအရေး၊ HIV လူနာတွေ၊ ကလေးစစ်သား၊ ရဟန်းသံဃာအရေး စတာတွေ အကုန်လုံး ပါဝင်လာမှာပဲ။ ဒါတွေကိုလည်း  ခပ်ခွာခွာမနေဘဲနဲ့ ပါဝင် လက်တွဲ ဆောင်ရွက်တာတွေ လုပ်ရမှာ ဖြစ်ပါတယ်။ အဲသည်လိုမျိုး နားလည်ကြစေချင်တယ်။ နောက်ပြီးတော့ ဒီအလုပ်တွေဟာ အင်န်အယ်ဒီရဲ့အလုပ်၊ အစကတည်းက လုပ်နေတဲ့၊ လုပ်နေရမယ့်အလုပ်တွေ ဖြစ်လို့ ဒါတွေဟာ အကြမ်းဖက်တဲ့အလုပ် မဟုတ်ပါ။ ပြီးတော့ ယူဂျီအလုပ်လည်း မဟုတ်ပါဘူး ဆိုတာကိုလည်း ထပ်ပြောချင်တယ် …”
လို့ ဆရာက ပြန်လည် ဖြေကြားပါတယ်။

လူမှုရေးနဲ့ နိုင်ငံရေးအကြောင်းကို အဓိကထားတဲ့ စကားပြောဝိုင်းဖြစ်နေတော့ မိုးမခကနေပြီးတော့ ဆရာ့ကို တင်ပြမိကြတာက ပြည်ပက၊ အမေရိကန်ပြည်ထောင်စုရောက် မြန်မာမိသားစုတွေရဲ့ မြို့နယ်အလိုက် စုစည်းပြီး ဆောင်ရွက်လာတဲ့ ပြည်သူ့ဂုဏ်ရည်လို့ အမည်ပေးထားတဲ့ စေတနာဝန်ထမ်းလူမှုလုပ်ငန်း စွမ်းဆောင်သူတွေကို ဂုဏ်ပြုရန် စီစဉ်နေတဲ့ အကြောင်း ဖြစ်ပါတယ်။ ဆရာဦးဝင်းတင်ကလည်း မျက်မှောက်ခေတ်ကို မျက်ခြေပြတ်မခံသူပီပီ အဲသည် ပြည်သူ့ဂုဏ်ရည်အစီအစဉ်အကြောင်း ကြားပြီးပြီ ဖြစ်တဲ့အကြောင်း၊ သဘောကျ အားပေး ထောက်ခံပါကြောင်း မှတ်ချက်ပေးသွားပါတယ်။

“အဲသည်မှာ လူမှုရေးလုပ်တဲ့နေရာမှာ သတ္တိရှိရှိနဲ့၊ ရဲရဲဝံ့ဝံ့နဲ့ စွန့်စားပြီး၊ စွန့်လွှတ်ပြီးတော့ အနစ်နာခံပြီး လုပ်ကြရတာကို ပြောချင်ပါတယ်။ အဲသည်လို လုပ်ကြတဲ့သူတွေ ရှိလာ များလာတဲ့အခါမှာ ပြည်သူတွေက အားတက်လာတယ်။ အားရှိလာတယ်။ ဥပမာဆိုရင် - ကိုဇာဂနာလိုမျိုး ဆောင်ရွက်သွားတာမျိုးတွေကို ကျနော်တို့က အသိအမှတ်ပြုရမယ်။”
လို့ ဆရာက သူ့အမြင်ကို ပြောပါတယ်။

          ဆရာ့ကို ဆက်ပြောဖြစ်ပြန်တာက အဲသည်ပြည်သူ့ဂုဏ်ရည်ဆုပေးဖို့ မြန်မာအမျိုးသားအချင်းချင်း ကြိုးစားဆောင်ရွက်ကြတဲ့နေရာမယ် ဂုဏ်ပြုရန်အမည်စာရင်း တင်သွင်းခံရသူ ၂၄ ဦး ရရှိတယ်လို့ ဆိုတဲ့အကြောင်း၊ အဲသည်ထဲမှာ ကိုဇာဂနာအပါအ၀င် ကိုကျော်သူတို့လို အနုပညာသမားတွေအပြင် နိုင်ငံရေးနဲ့ အင်န်အယ်ဒီနယ်ပယ်ထဲက မဖြူဖြူသင်း၊ ဦးမြင့်အေး၊ ဦးအေးမြင့်၊ ဦးအောင်သိန်း စတဲ့ရှေ့နေအစုအဖွဲ့တွေ ပါဝင်လာကြသလို လူမှုရေးအသင်းကြီးတွေ၊ ဘာသာရေးအဖွဲ့တွေ၊ ဆရာတော်တွေရဲ့ အမည်တွေ ပါဝင်လာတဲ့အကြောင်း တွေ့ရသည်များကို တင်ပြမိပါသေးတယ်။ ဆရာကလည်း သူနေထိုင်မကောင်းစဉ်က မိတ်ဆွေများက ပေးပို့ကူညီကြတဲ့ ငွေကြေးတွေကို ခွဲဝေပြီးတော့ အဲသည်က လူမှုလုပ်ငန်း စေတနာ့ဝန်ထမ်းစွမ်းဆောင်သူတွေထံ ပေးပို့ လှူဒါန်းတဲ့အကြောင်း၊ မိမိနဲ့ ဘ၀တူ နိုင်ငံရေးအကျဉ်းသားတွေ၊ မိသားစုတွေကို ကူညီအားပေးရန် သုံးစွဲတဲ့အကြောင်းတွေ ၀မ်းသာရအောင် ပြန်ပြောင်း ပြောပြပါတယ်။
         
          “ခုနင်ကလို ဖြူဖြူသင်းတို့ စောင့်ရှောက်နေတဲ့ လူနာတွေရဲ့ လုပ်ငန်းတွေက မနည်းဘူးပဲ။ အများကြီး။ အစက ကိုယ်က အဲသလောက်လို့တောင် မထင်မိဘူး။ နောက်ကျတော့မှ သိလာရတာလေ။ လူတွေက ဘယ်လောက် အားကိုးတကြီး ဖြစ်ကြသလဲဆိုတာ သိသာပါတယ်။ ဥပဒေအထောက်အကူအဖွဲ့တွေ ဆိုတာလည်း အရေးပါတယ်ဆိုတာ တွေ့ရပါတယ်။ လူတွေက ဥပဒေကြောင်းအရ ကူရာမဲ့၊ ကယ်ရာမဲ့ ဖြစ်နေရတာတွေ အများကြီး ရှိတယ်။ ဒါတွေကို သူတို့တတွေ လုပ်နိုင်ကြဖို့ လိုအပ်ပါတယ်။ နာရေး၊ ကျန်းမာရေး၊ ပညာရေးတွေမှာ လိုအပ်နေတာတွေ ရှိပါတယ်။”

          အဲသည်မှာ မေးဖြစ်တဲ့ မေးခွန်းကတော့ အင်န်အယ်ဒီကသာ ဒီနေရာတွေမှာ အင်န်ဂျီအိုတွေလိုသာ ၀င်ရောက်လုပ်ကိုင်လာမယ်သာဆိုရင် ဘယ်လိုမျိုး တုန့်ပြန်ချက်တွေ ရလာနိုင်သလဲ ဆိုတဲ့ မေးခွန်းဖြစ်ပါတယ်။ အဲသည်မှာ ဆရာဦးဝင်းတင်ရဲ့ ပြောပြချက်အရ အင်န်အယ်ဒီကသာ အဲသည်လိုရပ်တည်မယ်သာဆိုရင် ဘယ်လိုမျိုး အကူအညီတွေ၊ အထောက်အပံ့တွေ ပေးရမလဲလို့ ကမ်းလှမ်းလာကြတာတွေ ရှိတဲ့အကြောင်း၊ ဆရာအနေနဲ့ကတော့ ဒါမျိုးတွေကို စိတ်မ၀င်စားတဲ့အကြောင်း၊ မိမိတို့မူလ ရပ်တည်ချက်များ၊ ဆောင်ရွက်စရာများကို ဆက်လက် ဆောင်ရွက်သွားမှာ ဖြစ်ကြောင်း ဖြေကြားသွားပါတယ်။
         
          ဆရာဦးဝင်းတင်ရဲ့ သဘောထားများအရ နိုင်ငံရေးလုပ်ငန်းများကို ဆက်လက် ဆောင်ရွက်ဖို့ ဒီ/ချုပ်နဲ့ ဒီ/လှုပ်တွေမှာ ခိုင်မာညီညွတ်တဲ့ ရပ်တည်ချက်တွေ ရှိတယ် ဆိုတဲ့အတွက် မေးမိတဲ့ မေးခွန်းနောက်တခုကတော့ မြန်မာပြည်မှာ ပါတီတွေ၊ ခေါင်းစဉ်တွေ မရှိဘဲနဲ့ ရပ်တည်ခဲ့တဲ့ နိုင်ငံရေးလှုပ်ရှားမှုတခုကို ကောက်နုတ်ပြဖို့ဖြစ်ပါတယ်။
          “၁၉၅၀ ခုနှစ်တွေတုန်းက ဆရာကြီးသခင်ကိုယ်တော်မှိုင်းကို ၀န်းရံပြီး လှုပ်ရှားခဲ့တဲ့ ပြည်တွင်းငြိမ်းချမ်းရေးလှုပ်ရှားမှုကြီးကို သာဓကပြချင်ပါတယ်။ အဲသည်မှာ ဆရာကြီးသခင်ကိုယ်တော်မှိုင်းကို မဏ္ဍိုင်ပြုပြီး နိုင်ငံရေးသမားတွေ၊ စာပေအနုပညာရှင်တွေ၊ လူငယ်တွေ၊ တသီးပုဂ္ဂလတွေ၊ အလုပ်သမား၊ လယ်သမား လူတန်းစားအလွှာစုံက ပြည်တွင်းငြိမ်းချမ်းရေးအတွက် ၀ိုင်းရံဆောင်ရွက်ကြတာတွေကို တွေ့နိုင်ပါတယ်။ အဲသည်မှာ ပါတီတွေ၊ ခေါင်းစဉ်တွေ၊ ရာထူးတွေ ဆိုတာမျိုး အကန့်အသတ်တွေ မရှိကြဘူး။ အားလုံးမှာ လုပ်စရာ အလုပ်တွေပဲ ရှိတယ်။ ခုချိန်မှာလည်း အဲသည်လိုမျိုး အားလုံးဝိုင်းရံကြရမယ့် မဏ္ဍိုင်ကို အားလုံးက ၀ိုင်းရံပြီး လုပ်ကြရမယ့် သဘောမျိုးလို့ ပြောချင်ပါတယ်။”

          ဒီစကားဝိုင်းမှာ ပြောမိကြတဲ့ ခေါင်းစဉ်ဖြစ်တဲ့ လူမှုရေးနဲ့ နိုင်ငံရေး လှုပ်ရှားမှုနဲ့ အတိုင်းအတာများအကြောင်းကတော့ ဒီလောက်ပါပဲ။ မေးစရာ ကျန်သေးတဲ့ မေးခွန်းတွေနဲ့ စီစဉ်နိုင်သေးရင် စီစဉ်တင်ဆက်ပါဦးမယ်။

ရင်းမြစ်။ ။မိုးမခ