Monday, September 6, 2010
ရွေးကောက်ပွဲဝင်ခွင့် မှတ်ပုံတင်ကြေး မပေးသွင်းနိုင်၍ နိုင်ငံရေးပါတီများ၏ တင်သွင်းနိုင်သည့် လွှတ်တော် ကိုယ်စားလှယ်လောင်းများ အရေအတွက် မျှော်မှန်းထားသည်ထက် နည်းပါးခဲ့ရ
စနေနှင့် တနင်္ဂနွေ ရုံးပိတ်ရက်များတွင် လွှတ်တော် ကိုယ်စားလှယ်လောင်းများ အမည်စာရင်း တင်သွင်းခြင်းကို ဆောင်ရွက်နိုင်ကြောင်း ပြည်ထောင်စု ရွေးကောက်ပွဲ ကော်မရှင်က သြဂုတ်လ ၂၆ ရက် ရက်စွဲဖြင့် ထုတ်ပြန် ကြေညာခဲ့သည်။ ယင်းကဲ့သို့ စနေနှင့် တနင်္ဂနွေနေ့များတွင် အမည်စာရင်း တင်သွင်းခြင်းကို ဆောင်ရွက်နိုင်ခဲ့သည့် အပေါ် နိုင်ငံရေးပါတီများက ကြိုဆိုခဲ့ကြသော်လည်း မှတ်ပုံတင်ကြေး ကျပ်ငါးသိန်း မပေးသွင်းနိုင်၍ နိုင်ငံရေးပါတီများ၏ တင်သွင်းနိုင်သည့် လွှတ်တော် ကိုယ်စားလှယ်လောင်း အရေအတွက် မျှော်မှန်းသည်ထက် နည်းပါးခဲ့ရကြောင်း နိုင်ငံရေးပါတီများမှ တာဝန်ရှိသူများ၏ ပြောကြားချက်အရ သိရသည်။ "ရန်ကုန်တိုင်းမှာ ၀င်ရောက်ယှဉ်ပြိုင်ဖို့ လွှတ်တော် ကိုယ်စားလှယ်လောင်း ၄၅ ယောက် မျှော်မှန်းထားပေမယ့် အယောက် ၂၀ လောက်ပဲ ၀င်ရောက် ယှဉ်ပြိုင်ဖို့ ဖြစ်လာပါတယ်။ ပေးသွင်းရမယ့် ငွေကြေး မပြည့်လို့ အခုလို လျော့သွားရတာပါ"ဟု ပြည်ထောင်စု မြန်မာနိုင်ငံ အမျိုးသားနိုင်ငံရေးအဖွဲ့ချုပ် ဥက္ကဋ္ဌ ဦးအေးလွင်က ပြောကြားခဲ့သည်။ မျှော်မှန်းထားသည့် လွှတ်တော် ကိုယ်စားလှယ်လောင်း ဦးရေအတိုင်း အမည်စာရင်း တင်သွင်းနိုင်ခဲ့သည့် နိုင်ငံရေးပါတီအချို့လည်း ရှိခဲ့ကြောင်း စုံစမ်းသိရသည်။ နိုင်ငံရေးပါတီ တစ်ပါတီသည် အနည်းဆုံး မဲဆန္ဒနယ် သုံးနယ်တွင် မိမိပါတီကို ကိုယ်စားပြု၍ လွှတ်တော် ကိုယ်စားလှယ်လောင်းများ ၀င်ရောက်ယှဉ်ပြိုင်မှု မပြုနိုင်လျှင် ယင်းပါတီအား မှတ်ပုံတင်ခွင့် ပြုခဲ့ခြင်းကို ပယ်ဖျက်ရမည်ဖြစ်ရာ ယခု ကျင်းပသွားမည့် ရွေးကောက်ပွဲများတွင် အနည်းဆုံး မဲဆန္ဒနယ် သုံးနယ် ၀င်ရောက် မယှဉ်ပြိုင်နိုင်သည့် နိုင်ငံရေးပါတီလည်း ရှိကြောင်း စုံစမ်းသိရှိရကြောင်း ၂၀၁၀ ခုနှစ် စက်တင်ဘာလ ၃ ရက်နေ့ထုတ် Bi Weekly Eleven ဂျာနယ်တွင် ဖော်ပြထားပါသည်။
Subscribe to:
Post Comments (Atom)
0 comments:
Post a Comment