ဝပြည်သွေးစည်းညီညွတ်ရေးတပ်မတော် (UWSA) ခေါ် ဝတပ်ဖွဲ့က ၎င်းတို့၏တောင်းဆိုချက် (၉) ချက်ကို နအဖက ပယ်ချနေသည့်ကြားကပင် လိုက်လျောပေးရန် ယမန်နေ့က ထပ်မံတောင်းဆိုလိုက်သည်။
နယ်ခြားစောင့်တပ်ဖွဲ့စည်းရေးအတွက် အကြောင်းပြန်ရန် နောက်ဆုံးသတ်မှတ်ရက်ဖြစ်သည့် ယမန်နေ့၌ ဝတပ်ဖွဲ့က ယင်းသို့ တောင်းဆိုလိုက်ခြင်းဖြစ်သည်။
နယ်ခြားစောင့်တပ်ဖွဲ့စည်းရေးကို မူအားဖြင့် လက်ခံကြောင်း၊ သို့သော် ဒေသငြိမ်းချမ်းရေးနှင့် ဖွံ့ဖြိုးတိုးတက်ရေး အကျိုးစီးပွားအတွက် ယမန်နှစ်၊ နိုဝင်ဘာ (၁၄) ရက်က တန့်ယန်းမြို့တွင် တင်ပြထားသည့် တောင်းဆိုချက် (၉) ချက်ကို လိုက်လျောပေးပါက နယ်ခြားစောင့်တပ်ကို လက်ခံသွားမည်ဖြစ်ကြောင်း ဝတပ်ဖွဲ့က အကြောင်းပြန်ခဲ့သည်ဟု ဝခေါင်းဆောင်များနှင့် နီးစပ်သူတဦးက ပြောသည်။
၎င်းက “ပြီးခဲ့တဲ့ နိုဝင်ဘာ တန့်ယန်းမှာ တောင်းဆိုထားတဲ့ (၉) ချက်ကိုပဲ ကြိုက်သည်ဖြစ်စေ၊ မကြိုက်သည်ဖြစ်စေ ထပ်ပြီးတောင်းဆိုရမယ်ဆိုတဲ့ ဆုံးဖြတ်ချက်အတိုင်း နေပြည်တော်ကို တင်လိုက်တယ်၊ ဟိုကတော့ ဘာမှမပြောဘူး။ ဘာဖြစ်လာမလဲ စောင့်ကြည့်ရမှာပေါ့” ဟု ပြောသည်။
မိုင်းပေါက်နှင့် မိုင်းဖြန်အား မိုင်းပေါက်မြို့နယ်အဖြစ် သတ်မှတ်ကာ ဝကိုယ်ပိုင်အုပ်ချုပ်ခွင့်ရ တိုင်းဒေသကြီးအတွင်း (၆) မြို့နယ် အစား (၇) မြို့နယ်အဖြစ် ဖွဲ့စည်းသွားရေး၊ ထိုင်း-မြန်မာနယ်စပ်ရှိ ဝတပ်ဖွဲ့များအခြေစိုက်ရာ ဝမ်ဟုန်စစ်ဒေသအား ဝအုပ်ချုပ်ခွင့်ရဒေသ ဖွဲ့စည်းရေး၊ ဝမ်ဟုန်နှင့် ပန်ဆန်းဟူ၍ စစ်ဒေသခွဲ (၂) ခု သတ်မှတ်ကာ စစ်ဒေသမှူးနှင့် စစ်ဦးစီးမှူးကို ဝတပ်ဖွဲ့က တာဝန်ယူရေး၊ ဒု-စစ်ဒေသမှူးနှင့် ဒု-စစ်ဦးစီးမှူးဟူ၍ (၂) ဦးစီ ထားရှိမည်ဖြစ်ပြီး (၁) ဦးစီကို နအဖဘက်က တာဝန်ယူရေး၊ တပ်ရင်းအဆင့်တွင် ဝတပ်ဖွဲ့ဝင်များဖြင့်သာ ဖွဲ့စည်းရေးဟူ၍ တောင်းဆိုထားသည်။
ထို့အပြင် ကျန်းမာရေး၊ သင်တန်းနှင့် ထောက်ပံ့ရေးကိစ္စအား နအဖဘက်က တာဝန်ယူရေး၊ နယ်ခြားစောင့်တပ်ဖွဲ့တွင် မပါဝင်တော့သည့် တပ်ဖွဲ့ဝင်များအား ပင်စင်လစာ (၅) နှစ်စာအတွက် တလုံးတခဲတည်း ပေးရေး၊ မိဘမဲ့ကလေးများနှင့် စစ်ပွဲများကြောင့် ကိုယ်လက်အင်္ဂါ ဆုံးရှုံးခဲ့ရသည့် ဒုက္ခိတများအား နအဖဘက်က ကူညီထောက်ပံ့ရေး၊ အသွင်ကူးပြောင်းပြီး နောက်ပိုင်း တရားဥပဒေချိုးဖောက်ခြင်း မရှိတော့လျှင် ယခင်က ဥပဒေချိုးဖောက်ခဲ့သူများနှင့် မည်သည့်အဖွဲ့တွင် ပါဝင်ခဲ့သူများကိုမဆို လွတ်ငြိမ်းချမ်းသာခွင့်နှင့် ၎င်းတို့၏အသက်အိုးအိမ်စည်းစိမ်ကို လုံခြုံမှုအာမခံချက်ပေးရန် စသည့်အချက်များကို ထည့်သွင်းတောင်းဆိုထားသည်။
၂ဝဝ၈ ဖွဲ့စည်းပုံအခြေခံဥပဒေအရ ဝတပ်ဖွဲ့၏ နယ်မြေများတောင်းဆိုမှုမှာ မဖြစ်နိုင်တော့ကြောင်း ယမန်နှစ် နိုဝင်ဘာနှင့် ယခုနှစ် ဖေဖော်ဝါရီတွင် တွေ့ဆုံစဉ်၌ နအဖဘက်က ပြောဆိုထားခဲ့သည်ဟု အဆိုပါ ဝခေါင်းဆောင်များနှင့် နီးစပ်သူက ပြောသည်။
၎င်းက “၂ဝဝ၈ ဖွဲ့စည်းပုံကို မြန်မာတပြည်လုံးက တခဲနက်ထောက်ခံထားပြီးသားပေါ့။ ဖွဲ့စည်းပုံကို ပြန်ပြင်လို့ မရတော့ဘူး ဆိုတဲ့အချက်နဲ့ ပယ်ချထားပြီးသား။ အဲဒါကို ထပ်တောင်းတယ်ဆိုတော့ ဝအနေနဲ့ နယ်ခြားစောင့်တပ်လုပ်ဖို့ အဆင်သင့် မဖြစ်သေးဘူးဆိုတာ ပြန်ပြောလိုက်တဲ့သဘောပဲ” ဟု ပြောသည်။
ဝတပ်ဖွဲ့ခေါင်းဆောင် ပေါက်ယူချန်အား တွေ့ဆုံဆွေးနွေးလိုကြောင်း နအဖဘက်က အကြိမ်ကြိမ် ကမ်းလှမ်းမှုကို ပယ်ချခဲ့ရာမှ ပြီးခဲ့သည့် ဖေဖော်ဝါရီ (၂၆) ရက်တွင် ရှမ်းပြည်မြောက်ပိုင်း၊ တန့်ယန်းမြို့၌ ပေါက်ယူချန်း ဦးဆောင်သည့် ဝကိုယ်စားလှယ်အဖွဲ့နှင့် စစ်ဘက်ရေးရာ လုံခြုံရေးအဖွဲ့အရာရှိချုပ် ဒု-ဗိုလ်ချုပ်ကြီး ရဲမြင့်တို့ တွေ့ဆုံစဉ် ဝ၏တောင်းဆိုမှုကို နအဖဘက်က ငြင်းပယ်ပြီးနောက် ယခုကဲ့သို့ ပြန်လည်တုံ့ပြန်လိုက်ခြင်းဖြစ်သည်။
ခေတ်ပြိုင်
0 comments:
Post a Comment