လှိုင်သာယာစက်မှုဇုန်အတွင်းမှ စက်ရုံများတွင် အလုပ်သမားများ ဆန္ဒပြမှု ဖြစ်ပွားနေလျှက်ရှိပြီး လမ်းဘေးတလျှောက် လုံခြုံရေးများတင်းကြပ်စွာ ချထားကြောင်း အလုပ်သမားတဦးက ပြောသည်။
အိုပယ်ဝမ်း၊ အိုပယ်တူး၊ ရပ်စ်(Yes)၊ သုံးထပ်စက်ရုံများမှ အလုပ်သမား (၂၀၀၀)ခန့်သည် ယမန်နေ့ ညနေပိုင်းကတည်းက တောင်းဆိုချက် (၃) ချက် ရရှိရေးအတွက် တောင်းဆိုခဲ့ခြင်းဖြစ်ပြီး ညှိနှိုင်းမှုများပြုလုပ်နေသည်ဟု ပြောသည်။
“အခု ညှိနှိုင်းနေတုန်းဘဲ၊ လုံခြုံရေးတွေကတော့ တော်တော်များတယ်၊ လုံထိန်းကား လက်နက်အပြည့်နဲ့ ၃၂ စီး၊ နောက်ထပ်ရဲကား ၇ စီး၊ မီးသတ်ကား ၅ စီးနဲ့ အချုပ်ကား ၄ စီးကို အပြင်လမ်းဘေးမှာ ရပ်ထားတယ်၊ အထဲကို ဘယ်သူမှ ဝင်လို့မရအောင် ပိတ်ထားတယ်” ဟု ပြောသည်။
အလုပ်သမားများက (၁) လုပ်အားခ လစာ တသောင်းထပ်တိုးပေးရန်၊ (၂) အလုပ်ချိန်လျော့ပေးရန်၊ (၃) အလုပ်သမားများ စားသောက်နေထိုင်သည့်နေရာများ သန့်ရှင်းရေး ဆိုသည့်အချက် (၃) ချက်ကို တောင်းဆိုထားခြင်း ဖြစ်သည်။
ယခုလက်ရှိ အလုပ်ချိန်မှာ နံနက် ၇ နာရီခွဲမှ ည ၁၁ နာရီအထိလုပ်နေရပြီး အလုပ်သမားများ တောင်းဆိုချက်များထဲမှ လုပ်အားခတိုးပေးရေးအတွက် ယခုအချိန်ထိ ဆက်လက်ညှိနှိုင်းနေလျှက်ရှိကြောင်း ၎င်းက ဆက်ပြောသည်။
ယခုဆန္ဒပြနေသည့် စက်ရုံများမှာ အထည်ချုပ်လုပ်ငန်း၊ သကြားလုံးနှင့် စားသောက်ကုန်လုပ်ငန်းများကို လုပ်ကိုင်နေခြင်းဖြစ်ပြီး စက်မှုဇုံအတွင်းရှိ စက်ရုံပေါင်း ၃၀၀ ခန့်မှာ စီးပွားရေး ကျဆင်းမှုများကြောင့် လည်ပတ်နိုင် ခြင်းမရှိတော့ဘဲ ပိတ်ထားရသည်။
ပြီးခဲ့သည့် ဒီဇင်ဘာလအတွင်းကလည်း ယင်းစက်မှုဇုံအတွင်းမှ အထည်ချုပ်စက်ရုံနှင့် ဖိနပ်စက်ရုံမှ အလုပ်သမား လုပ်အားခတိုးမြှင့်တောင်းဆိုသည့် ဆန္ဒပြပွဲများ ဖြစ်ပွားခဲ့ပြီး စက်မှုဇုံ စီမံခန့်ခွဲရေး၊ ပြည်ထဲရေးနှင့် အလုပ်သမား ညွှန်ကြားရေးမှူးဦးစီးဌာနတို့က ဆောင်ရွက်ပေးခြင်းများ ပြုလုပ်ခဲ့သည်။
Tuesday, 09 February 2010 17:40 ရိုးမ ၃
0 comments:
Post a Comment