လွန်ခဲ့သော ဇူလိုင်လနှောင်းပိုင်း၌ ဗိုလ်ချုပ်မှူးကြီး သန်းရွှေမိသားစုနှင့် နောက်လိုက်များ အိန္ဒိယသို့ (၅) ရက် ဘုရားဖူးသွားခဲ့ပြီးနောက် မကြာမီ စက်တင်ဘာလအစောပိုင်းတွင် တရုတ်ပြည်သို့ (၅) ရက် ဘုရားဖူးသွားပြန်သည်။ လူဦးရေ သန်း (၅၀) ရှိသော မြန်မာသည် သန်း (၁,၁၀၀) ရှိသော အိန္ဒိယနှင့် သန်း (၁, ၃၀၀) ရှိသည့် တရုတ်ကို အညီအမျှ (၅) ရက်စီ ဂါရ၀ပြုလိုက်ခြင်းပင်ဖြစ်သည်။ မြန်မာပြည်တွင် ဘုရားရုပ်ထုပေါင်း သိန်းချီရှိနေပြီး ဘုရားရုပ်ထုအသစ်များကို အမြဲတမ်း ထုလုပ်လျက်ရှိနေသော်လည်း ဗိုလ်ချုပ်မှူးကြီးသည် အိန္ဒိယဘုရားနှင့် တရုတ်ဘုရားကို ပို၍ အထင်ကြီးပုံရသည်။ တရုတ်ပြည်မှ စွယ်တော်ကိုပင့်၍ မြန်မာပြည်တွင် အလှူငွေကောက်ခံသည့်အပြင် တရုတ်စွယ်တော်ကို အတုလုပ်၍ ရန်ကုန်၌ ကိုးကွယ်ထား၏။ ကြပ်ပြေး၌လည်း ရွှေတိဂုံစေတီအတုကို ကိုးကွယ်နေ၏။ သံဃာနှင့် အရပ်သားများကို သတ်ဖြတ်၍ ဒုက္ခသည်ကူညီရေးကို ပိတ်ပင်တားမြစ်သော ဗိုလ်ချုပ်မှူးကြီးသည် ဘုရားတည်၍ ရုပ်ထုကိုးကွယ်ကာ အိန္ဒိယသို့ ဘုရားဖူးရုံဖြင့် အကုသိုလ်များ ကွယ်ပျောက်သွားလိမ့်မည်ဟု ယုံကြည်နေပုံရသည်။ ဗုဒ္ဓဘာသာအတုကို ကိုးကွယ်သူက ဒီမိုကရေစီအတုကို ထုတ်လုပ်လိုက်ခြင်းဖြစ်၏။
ဗိုလ်ချုပ်မှူးကြီး၏ အတုအယောင်ဆောင် ဘာသာရေး၊ နိုင်ငံရေးလုပ်ငန်းများကို မဟာသံဃာ့နာယကများကလည်း ထောက်ခံအားပေးကြ၏။ အင်္ဂလိပ်ကိုလိုနီခေတ်၌လည်း သံဃာ့နာယကများသည် ကိုလိုနီအစိုးရ အကြိုက်လိုက်လုပ်ခဲ့သည်။ အကျဉ်းထောင်ထဲ၌ သင်္ကန်းမ၀တ်ရမချင်း သေသည်အထိ အစာငတ်ခံရန် ဆရာတော် ဦးဝိစာရ သန္နိဋ္ဌာန်ချခြင်းသည် ၀ိနည်းဒေသနာနှင့် ဆန့်ကျင်ကြောင်း ကိုလိုနီအစိုးရ၏ ဘွဲ့တံဆိပ်တော်ရ မဟာနာယက သံဃာများက ဆုံးဖြတ်ခဲ့သည်ကို အစိုးရသတင်းစာတွင် ထည့်သွင်းဖော်ပြ၍ ဦးဝိစာရကို သိက္ခာချရန် ကြိုးစားသေး၏။ ထို့ကြောင့် ဦးဝိစာရ၏ အစာငတ်ခံတိုက်ပွဲသည် ၀ိနည်းဒေသနာတော်နှင့် ညီညွတ်ကြောင်း သံဃသာမဂ္ဂီအဖွဲ့ချုပ်က ကျမ်းဂန်အကိုးအကားဖြင့် ရှင်းပြသော စာတမ်းများကို ကျေးလက်တောရွာအထိ ဝေငှရသည်။ ဦးဝိစာရသည် သာသနာအတွက် အသက်စွန့်သည်ဖြစ်၍ သာမန်ပုထုဇဉ်များ ပြုနိုင်ခဲသောအမှုကို ပြုသည်ဖြစ်၍ ၀ိနည်းနှင့် ညီသည်ဟုဆို၏။ ထိုစဉ်မှစ၍ အစိုးရသံဃာနှင့် ပြည်သူ့သံဃာဟူ၍ သံဃာနှစ်မျိုးနှစ်စား ကွဲပြားသွားခြင်းဖြစ်၏။
သမိုင်းအစဉ်အလာအရ သံဃာ့သာမဂ္ဂီအဖွဲ့သည် ပြည်သူ့သံဃာအဖွဲ့ဖြစ်သည်။ ကိုလိုနီခေတ်ကို သံဃာ့သာမဂ္ဂီ သုံးသပ်ထားပုံသည် အလွန်စိတ်ဝင်းစားဖွယ်ကောင်း၏။ မြန်မာပြည်၌ ဆင်းရဲမွဲတေ၍ အသိဉာဏ်ပညာနှင့် အကျင့်သီလ ခေါင်းပါးနေသည်ကို ဒုက္ခသစ္စာဟု အဓိပ္ပာယ်ဖွင့်ဆိုသည်။ တိုင်းပြည် ဆင်းရဲရသည့်အကြောင်းရင်း သမုဒယသစ္စာကို ရှာဖွေရာ၌ လူတစုက တိုင်းပြည်ကို ခွစီး၍ သွေးစုတ်ခြယ်လှယ်မှုနှင့် အစိုးရ၏ လိမ်လည်လှည့်ဖြားမှုကို တွေ့ရ၏။ အာဏာရှင်အောက်မှ တိုင်းပြည်လွတ်မြောက်မှသာ နိရောဓသစ္စာကို တွေ့ရမည်ဆိုသည်။ လွတ်မြောက်စေမည့် မဂ္ဂသစ္စာနည်းလမ်းများသည် ကန့်ကွက်ဆန္ဒပြနည်းနှင့် သပိတ်မှောက်နည်းအမျိုးမျိုးဖြစ်သည်ဟုဆို၏။ ပြည်ညှဉ်းမင်းမခံနိုင် ဆိုသည့်မူကို လက်ကိုင်ထား၍ လူထုအင်အားသုံးနည်း၊ လွတ်လပ်ရေး၊ ဘာသာရေး၊ ပညာရေး၌ အမြင်မှန်ရအောင် ဟောကြားနည်းနှင့် အမျိုးသမီးများ နိုင်ငံရေးစိတ်ဝင်စားအောင် အားပေးနည်းများကို သုံးရမည်ဟုဆို၏။ အာဏာရှင်လူတစု ကြီးစိုးသော တိုင်းပြည်၏ ထွက်ရပ်လမ်းသည် သံဃာ့သာမဂ္ဂီက ရှင်းပြထားသော လောကီရေးရာ သစ္စာလေးပါးတရားပင်ဖြစ်ပေသည်။
ဗုဒ္ဓဘာသာအများစု နေထိုင်သောတိုင်းပြည်တွင် ပြည်သူဒုက္ခရောက်နေသည်ကို ဗုဒ္ဓဘာသာအဖွဲ့အစည်းနှင့် သံဃာများက အလေးအနက်မထားဘဲ လျစ်လျူရှုနေသဖြင့် ဗုဒ္ဓဘာသာကို ယုံကြည်သူ နည်းပါးသွားကြောင်း တောင်ကိုရီးယားနိုင်ငံက သက်သေပြနေသည်။ တောင်ကိုရီးယားဗုဒ္ဓဘာသာသမိုင်းဟာ နှစ်ပေါင်း (၁,၇၀၀) ရှိပြီဖြစ်သဖြင့် အလွန်အခြေခိုင်မည့်ပုံ ပေါ်နေ၏။ ဒုတိယကမ္ဘာစစ်ပြီးချိန်၌ တောင်ကိုရီးယားလူဦးရေ (၉၉) ရာခိုင်နှုန်းသည် ဗုဒ္ဓဘာသာများဖြစ်ကြပြီး (၁) ရာခိုင်နှုန်းကသာ ခရစ်ယာန်ဘာသာဝင်ဖြစ်သည်။ ယခုအခါ လူဦးရေ (၅၀) ရာခိုင်နှုန်းသည် ခရစ်ယာန်ဘာသာဝင်များ ဖြစ်နေကြပြီး ဗုဒ္ဓဘာသာဦးရေသည် (၁၅) ရာခိုင်နှုန်းသာ ကျန်ရှိတော့၏။
ဤသို့ဖြစ်ရသည့် အကြောင်းရင်းသည် ဗုဒ္ဓ၀ါဒနှင့်ရော ခရစ်ယာန်ဝါဒနှင့်ရော မသက်ဆိုင်ပါ။ လူမှုရေးပြဿနာကို ကိုင်တွယ်ဖြေရှင်းရာ၌ ဗုဒ္ဓဘာသာဝင်နှင့် ခရစ်ဘာသာဝင်တို့ အမြင်ချင်း ကွဲပြားခြားနားသည့်အပေါ်တွင် အခြေခံပါသည်။ ဒုတိယကမ္ဘာစစ် ပြီးဆုံးပြီး မကြာမီ တောင်နှင့်မြောက်ကိုရီးယား စစ်ဖြစ်သည့်အတွက် တိုင်းသူပြည်သားများ ဆင်းရဲဒုက္ခရောက်ရသည်။ လူမှုစီးပွားရေး ဒုက္ခပင်လယ်ဝေနေသည်ကို တည်ငြိမ်အေးချမ်းပြီး လောကီအရေးကို ဂရုမစိုက်သည့် ဗုဒ္ဓဘာသာက အကူအညီမပေးနိုင်ပါ။ ခရစ်ယာန်ဘာသာဝင်ကသာ လက်တွေ့ထွက်ပေါက်ပေးနိုင်ပါသည်။ ကွန်မြူနစ်သြဇာမလွှမ်းမိုးအောင် တောင်ကိုရီးယားကို အမေရိကန်က စီးပွားရေးထောက်ပံ့ရာမှာ ခရစ်ယာန်သာသနာပြု အဖွဲ့အစည်းများကတဆင့် ပေးသည်။ ထို့ကြောင့် ပြည်သူလူထုသည် ခရစ်ယာန်သာသနာပြုကို ကယ်တင်ရှင်အဖြစ် မြင်လာကြသည်။ အတတ်ပညာ၊ ဆေးဝါးနဲ့ လူမှုစီးပွားရေး အကူအညီပေးနိုင်သော ခရစ်ယာန်ဘာသာကို တိုးတက်မှုအဖြစ် သတ်မှတ်လာကြ၏။ ဒီနည်းအတိုင်း ချင်းတိုင်းရင်းသားများ ခရစ်ယာန်ဘာသာဝင် ဖြစ်ကုန်ကြသည်။ ဖိနှိပ်ခံရသူများကိုလည်း ခရစ်ယာန်ဘုရားကျောင်း ကူညီ၏။
ဗုဒ္ဓဘာသာအဖွဲ့အစည်းများသည် ခေတ်ပညာမတတ်သည့်အတွက် ခေတ်၏ ပြဿနာကို မည်သို့ဖြေရှင်းရမှန်း မသိကြပါ။ တနည်းဆိုပါက မတရားသည့်အစိုးရကို ကိုရီးယားဗုဒ္ဓဘာသာသည် မည်သို့ ကိုင်တွယ်ရမည်ကို မသိပါ။ ဤအတောအတွင်း အိမ်ထောင်ပြုသော ဂျပန်ဂိုဏ်းနှင့် အိမ်ထောင်မပြုရသော ကိုရီးယားဂိုဏ်း ပဋိပက္ခဖြစ်မှု၊ ဘုန်းကြီးအချင်းချင်း ကျောင်းလု၍ ရိုက်နှက်ထိုးကြိတ်မှု စသည့် အကြမ်းဖက်မှုများကြောင့် ဗုဒ္ဓဘာသာဘုန်းကြီးများ သိက္ခာကျလာသည်။ ဗုဒ္ဓဘာသာဘုန်းကြီး သိက္ခာကျလေ ခရစ်ယာန်ဘာသာကို ယုံကြည်ကိုးကွယ်သူ များလာလေလေဖြစ်လာသည်။
ယခုအခါ၌ လောင်းကစားသောဘုန်းကြီး၊ ပစ္စည်းစုသောဘုန်းကြီး၊ အကြမ်းဖက်သောဘုန်းကြီး စသည်များကို ဖယ်ရှားနိုင်ရန် ဗုဒ္ဓဘာသာပြုပြင်ရေး လုပ်နေသည်ဟူ၏။ ဗုဒ္ဓဘာသာဝင်အချင်းချင်း လက်တွဲ၍ လူ့အဖွဲ့အစည်းအတွက် ကောင်းရာကောင်းကြောင်း ဆောင်ရွက်သော စီမံကိန်းများကို အကောင်အထည်ဖော်နေပြီဟူ၏။ ကျက်သရေရှိသော ဗုဒ္ဓဘာသာ အဖွဲ့အစည်းဆိုသည်မှာ ရွှေစေတီနှင့် ရွှေကျောင်းတော် တည်ဆောက်ခြင်းမဟုတ်ဘဲ သံဃာ၊ သီလရှင်နဲ့ လူပုဂ္ဂိုလ်အားလုံး မာန်မာနကို ချိုးနှိမ်ပြီး နိဝါတတရားနှင့်အညီ တိုင်းပြည်တည်ဆောင်ခြင်းဖြစ်သည်ဟု ကိုရီးယား ပြုပြင်ရေးသမားများက မြင်သည်။
သံဃာနှင့် ပြည်သူသည် ကျွန်းကိုင်းမှီ ကိုင်းကျွန်းမှီဆိုသကဲ့သို့ တဦးနဲ့တဦး အပြန်အလှန်အကျိုးပြုကာ ရပ်တည်နေကြသောကြောင့် လူမှုစီးပွားရေးပြဿနာ၊ တိုင်းရင်းသားလူမျိုးစုပြဿနာ၊ သဘာဝပတ်ဝန်းကျင် ပျက်စီးသည့်ပြဿနာ စသည်များကို လက်တွဲဖြေရှင်းမှသာ သာယာစိုပြေနိုင်မည်ဟုလည်း ကိုရီးယား ဗုဒ္ဓဘာသာပြုပြင်ရေးသမားများက ယူဆ၏။ ထိုကြောင့် ရှေးဟောင်းစည်းကမ်းကိုသာ လိုက်နာပြီး လူ့ဘ၀တိုးတက်ရှင်သန်ရေးကို လျစ်လျူရှုခြင်းသည် တာဝန်မဲ့ရာကျသည် ဟုဆိုသည်။ ဤသည်မှာ အစိုးရလိုလားသော ဗုဒ္ဓဘာသာနှင့် ပြည်သူလိုလားသော ဗုဒ္ဓဘာသာ၏ ကွာခြားချက်ဖြစ်၏။
ပစ္စည်းမက်လွန်းသည့် ကိုရီးယားဗုဒ္ဓဘာသာဝင်ကို အမေရိကန်ဘုန်းတော်ကြီး ဗောဓိဘိက္ခုက တရားချရသည်။ ပစ္စည်းဥစ္စာအာဏာကို မက်မောနေ၍ ပျော်ရွှင်မှု အစစ်အမှန်ကို ရမည်မဟုတ်ဘဲ လောဘဒေါသမောဟကို ထိန်းသိမ်းပြီး လူလူချင်း စာနာထောက်ထားနိုင်မှ စစ်မှန်သော ပျော်ရွှင်မှု ရနိုင်သည်ကို ဟောကြားရသည်။ အာဏာနှင့် ဥစ္စာပစ္စည်းပိုင်ဆိုင်မှုကို အဓိကထားသော အာဏာရှင်ဝါဒကို ဗုဒ္ဓ၀ါဒနဲ့ ခရစ်ယာန်ဝါဒက ဆန့်ကျင်ကြောင်း ဟောကြားသည်။ လက်ရှိဘ၀ကို တိုးတက်ကောင်းမွန်အောင် လုပ်ပေးနိုင်သော ဗုဒ္ဓဘာသာကျင့်စဉ်ကသာ ဗုဒ္ဓဘာသာကို မြှင့်တင်နိုင်လိမ့်မည်ဟု ပြုပြင်ရေးသမားများက ယုံကြည်ကြပေသည်။
ရင်းမြစ်။ ။ခေတ်ပြိုင်
